Press "Enter" to skip to content

Yn ïoh jingmyntoi ki bym pat pynrung kyrteng MHIS ha ki khep ba shitom jur

Shillong, Jylliew, 13: Ka tnat ka Koit ka Khiah jong ka Sorkar Jylla kaba la shong ïa ka Review Meeting mynta ka sngi palei ka la shim ïa ka rai ba lada don kino kino ki nongshong shnong ka Jylla ki bym pat pynrung kyrteng ïalade ha ka Meghalaya Health Insurance Scheme (MHIS) hynrei haba ki leit shah sumar ha ki Hospital ha ki khep ba kyrkieh yn ñiew noh ïa ki kum ki nongpang ba la pynrung kyrteng ha ka MHIS.
U Myntri ka tnat ka Koit ka Khiah ka Sorkar Jylla, u Bah Alexander L. Hek ha ka jingïakren bad u nongthoh khubor u la ong, “hadien ba ngi la shong ïa ka Review Meeting ha Tura dang shen, u Myntri Rangbah, u Conrad K. Sangma, u la pynpaw ba ka jingpynrung kyrteng na ka bynta ka MHIS-Phase IV ka duna
shaba palat kumba ka long mynta.”
Ïa ka MHIS la pynrunglang bad ka Ayushman Bharat-Pradhan Mantri Jan Arogya Yojana ba la pynbna ha ka 23 tarik u Nailar, 2018 da u Myntri Rangbahduh ka ri, u Narendra Modi kaba ïarap ïa ki nongpang ban ïoh jingmyntoi T.5 lak na ka bynta kawei ka longing.
“Dei na kane ka daw ba ngi la shong biang ïa ka Review Meeting mynta ka sngi bad ki Ophisar ka tnat ka Koit ka Khiah ban shim ïa kane ka rai da kaba ïatreilang hapdeng ka tnat ka koit ka khiah bad ki nongpynïaid ïa ka MHIS,” ong u Bah Hek.
U la ïathuh ruh ba ka jingduna shaba palat jong ki paidbah ban pynrung kyrteng kam dei satia na ka jingsniew ki mashin hynrei ïa ka jingpynrung kyrteng lah tang 30 ngut haduh 40 ngut eh ha ka shi sngi. “Dei na kane ka daw ba ka shimpor. Ka Software kaba mynshwa ka pdiang ban pynrung 130 ngut hynrei mynta la pynkiew pat haduh 300 ngut,” ula bynrap.
“Watla katta, nga kwah ban pyntip sha ki padbah nongshong shnong ka Jylla ba lada don kino kino ki bym pat pynrung kyrteng ne ki bym pat rejistar ha ka MHIS lada ki ïakynduh ïa ki khep kiba kyrkieh haba ki leit sha sumar sha ki Hospital ba la ïateh kular hapdeng ka Sorkar ban pyntreikam ïa ka MHIS yn niew ïa ki kum ki nongpang ba ladep pynrung kyrteng ha kane ka skhim. Kim dei satai ban khuslai jingmut,” la pynshai shuh shuh u Bah Hek.
U la ïathuh ruh ba kane ka jingpyntreikam thymmai ïa kane ka skhim kan long ruh wat ïa kito kiba la don ïa ka MHIS Card kaba rim bad wat ïa kito ki bym pat pynrung kyrteng.
“Hynrei watla katta, nga kyrpad ïa ki paidbah nongshong shnong ka Jylla ba kim dei ban shim sting hynrei ban leit pynrung kyrteng noh ïalade khlem pynslem,” ong shuh shuh u Bah Hek.