Press "Enter" to skip to content

Byrngem ïakhih ka KSA lada ym tei biang ka Assam ïa ka BOP ha Khatkasla

Karbi Anglong, Jylliew 15: Karbi Students Association (KSA) ba ïalam da u Semson Teron, kala dawa ïa ka Sorkar Jylla ban tei biang ïa ka Border Outpost bala pynpra dang shen ha Khatkasla, West Jaiñtia Hills lem kumta kan pynlong ïa ka jingïakhih ba tyngeh.
Kane ka Seng kala kam ba ïa kane ka Border Outpost jong ki Pulit Assam la tei ha ka jaka Umkhermi kaba hap hapoh ka West Karbi Anglong.
Kat kum ki jingtip, ki Pulit ka Assam kila shna ïa ka BOP ha Umkhermi naduh ka 11 tarik u Jylliew 2019 hynrei ha ka 12 tarik Jylliew, ki bor pynïaid District ka West Jaiñtia Hills bad ki Pulit kila leit ban khang pyrshah bad hukum ïa ki Pulit ka Assam ban mih shisyndon na kane ka jaka.
Na ka liang ki bor pynïaid ka West Karbi Anglong ryngkat ki Pulit bad ki CrPF kila hiar sha Khatkasla hynrei namar ka jingbym lah shim rai, kila rai ban pynpra noh ïa ka BOP bala shna shipor ha kane ka jaka.
Kane ka jingpyrshang jong ka Assam ban shna Police Out Post ha katei ka jaka kam dei ka sien kaba nyngkong, hynrei ka sien saw kaba la sdang naduh ki snem 2000 hajan Wah Myntang. Ha u snem 2018 Kyllalyngkot 29 ha Khatkasla bad 2019 ha ka khlaw shnong ka shnong Khatkasla-Psiar kaba la sdang naduh ka taiew ba khatduh u bnai Jymmang.
Ki Pulit Assam kila shna ïa kane ka ktem pulit ha Iurim Biam, Khatkasla ka lynti ban leit sha Umkhyrmi bad Mokoilum naduh ka taiew ba nyngkong une u bnai Jylliew.
Haba dawa ban tei biang ïa ka BOP, u Semson Teron ula ong ba ka Sorkar ba lamkhmat da ka BJP hapoh ka jingïalam jong u Sarbananda Sonowal kala pulom ha ka jingtreikam bad ong ba lada ka Sorkar kam shim ïa ka sienjam ban tei pat ïa ka BOP, ka Karbi Students Association (KSA) kan shim noh da ki lynti jong ki jingïakhih.