Press "Enter" to skip to content

Da ka spong ka phali shah pynkup u Rangbah Shnong bathymmai ka Nongpoh

Nongpoh, Jylliew, 15: Ban dang saindur ïa ka bha ka miat bad ka roi ka par jong ka shnong ka thaw ha baroh ki liang, ka Dorbar shnong Nongpoh hadienba ka la lah ban jied thymmai ïa ki nongïalam Shnong d ka jingsarong ryngkat u Paiem ka Hima Khadar Lyngdoh, Nongpoh Sirdarship Elaka mynta ka sngi ki la pynkhamti ïa ka bor katkum ka riti ka dustur ïa u Rangbah Shnong ba thymmai ka Shnong Nongpoh ryngkat ki kynhun nongtrei hapoh ka Dorbar Shnong.
Kum ban pynkynmaw, ka Dorbar Shnong Nongpoh dang shen ka la lah ban jied thymmai ïa ki nongïalam Shnong ba kynthup ïa u Bah Silvester Mynsong kum u Rangbah Shnong, Assistant Rangbah Shnong, u Bah Plielad Tiewsoh, Secretary Shnong, u Bah Michael Kharhunai bad kynthup 28 ngut ki dkhot ka Executive Committee ka Dorbar Shnong ki ban long kita ki nongkit nongbah na ka bynta ka bha ka miat bad ka shongsuk shongsuk shongsain bad ruh ka roi ka par jong ka Shnong Nongpoh hi baroh kawei.
Da ka jingsarong ki paidbah nongshong shnong ka Nongpoh ba kynthup naduh ki Seng Longkmie, ki longkpa bad ki khun samla shi bynta ban burom ïa kine ki nongïalam Shnong ki la pynkup burom bad ryngkat ka spong ka phalli ïa u Rangbah Shnong, u Bah Silverster Nongshli ba la shim ïa ka bynta ban pynspong da u Paiem ka Hima Khadar Lyngdoh, Nongpoh Sirdarship Elaka, u Paiem Wanphrang Syiem Nongshai kiba dei hi katkum ka riti ka dustur.
Na ka liang u Paiem Wanphrang Syiem Nongshai ha kane ka sngi u la aiti ruh ïa u Bah Silvester Nongshli ïa ka Sanat kaba dei katkum ka riti ka dustur ha ka synshar ka khaddar kum kita ki nongïalam Shnong ba la ithuh da ka bor Hima bad kiwei kiwei ki bor ba dei peit ha ka synshar ka khaddar.
Hadien ba la pyndep ban pynspong ïa kata ka spong ka phalli ban pynskhem pura kum u rangbah Shnong ba pura ka Shnong Nongpoh, u Bah Silvester Nongshli haba kren ha kane ka sngi u la pynpaw ka jingkmen naduh ki paidbah nongshong shnong bad ruh u Paiem ka Hima Khadar Lyngdoh, Nongpoh Sirdarship Elaka kiba la ai ïa u ïa kata ka bor ba pura ban shim ïa kata ka lyngkor kum u Rangbah Shnong ba pura ka Shnong Nongpoh.
U Bah Mynsong kumba ki paidbah ki la jied ïa ban long u Rangbah Shnong, u la buh ruh ka jingkyrpad naduh ki paidbah nongshong shnong bad ruh ka Hima bad ki bor sorkar ba kin ai kata ka jingïatrei lang, namar ka thong hi ban long kum u Rangbah Shnong ka long ban peit ïa ka bha ka miat, ka roi ka par jong ka Shnong ka thaw.
Na ka liang u Paiem ka Hima Khadar Lyngdoh, u Paiem Wanphrang Syiem Nongshai u la ai ka jingïaroh ïa ki paidbah ka Shnong Nongpoh ba ki don kata ka jingburom ïa ki nongïalam ba la pynkup bor da ki paidbah bad dei namar kane ka daw ki la shim kata ka jingkitkhlieh ban ai ka nam bad ka burom da kaba pynkup burom ïa kine ki nongïalam Shnong ba thymmai ka Shnong Nongpoh.
U buh ruh ka jingkyntu k ynpham ïa ki paidbah nongshong shnong ba kim dei ban long kita ki maw jynthud ha ka imlang ka sahlang bad kumba ki la jied ban long kita ki nongïalam Shnong ki dei ruh ban ai ka jingïatrei lang na ka bynta ka bha ka mait bad ka roi ka par jong ka Shnong ka thaw.
Shuh shuh, u la kyntu ruh nalor ki kam kiba long na ka bynta ka bha ka miat bad ka roi ka par jong ki paidbah, ki paidbah kim dei ban klet pat ïa ki riti ki dustur, namar ka riti ka dustur ruh ka dei kawei na ka jingdonkam ba hakhmat eh ban pynim bad tehsong ïa la ka jaid bynriew.