Press "Enter" to skip to content

ïa kynduh u CM bad ki Myntri ïa u PM ïoh jingkular shikhung ki song jingïarap

Shillong, Jylliew 15 : U Myntri Rangbah duh jongka ri u Narendra Modi u la kular ban ai shikhung ki song jingïarap ïa ka jylla Meghalaya ha ka jingïakynduh jongu mynta ka sngi ha nongbah Delhi ïa u Myntri Rangbah ka jylla u Conrad K Sangma ba la don lang ka MP na Tura ka Agatha Sangma, u myntri ka tnad ka koit ka khiah u bah A.L Hek, u myntri ka tnad Sport u bah Banteidor Lyngdoh bad u myntri ka tnad PHE u bah Samlin Lyngdoh.
Kane ka jingïakynduh jong u myntri rangbah ka jylla, ki myntri sorkar jylla bad ka MP ïa u Myntri Rangbah duh ka ri ka long ha ka por 11.30 mynstep ha ka ïing sah jongu ha 5 Race Course Road, New Delhi bad la ïathuh ba kane ka jingïakynduh kaba la neh katto katne por la ïakren bun ki mat kiba ïadei na ka bynta ka jylla La iathuh ruh ba ka jingïakynduh ka la long kaba seisoh bha haduh katta katta na ka bynta ka jylla.
Kawei na ki mat jingïakren kaba kongsan eh ka long halor ka jingpan jingïarap na u myntri rangbah duh ka ri na ka bynta ka National Games ka ban long ha kane ka jylla ha u 2022 namar kumba ka long mynta ka jylla ka donkam haduh 2000 klur tyngka ka pisa ban tei ïa ki stadium,ki jaka sah jong ki nongïalehkai ki surok bad kiwei kiwei ki jingdonkam. Halor kane la ïoh jingtip ba u myntri rangbah duh ka ri u la kular ban ïarap ïa ka jylla.
Kane ka jingkular jong u myntri rangbah duh ka ri ïa u myntri rangbah ka jylla ka la pynhun jrut bha ïa u bad ïa ki myntri jongu kiba la synran lang ha katei ka jingïakynduh.
Nalor kane ki don bun kiwei kiwei ki mat ba la ïakren ïa kaba u myntri rangbah ka jylla lem bad kiwei ki myntri kim pat kwah ban pynpaw namar ki kwah ban pyllait khubor ha ka Sngi U Blei ba kan mih ha ka Lah Sngi U Blei khnang ba ki paidbah ka jylla kin ïoh jingtip lut halor kane ka jingleit Delhi jongki.