Press "Enter" to skip to content

Phah u CM ka Punjab ïa u Myntri, MP bad MLA ban ïa kynduh ïa u CM ka jylla

Ba shah byrngem ki Harijan ha ka HNLC

Shillong, Jylliew 15: U Myntri Rangbah ka Punjab u Captain Amarinder Singh, ula phah kyrkieh ïa ka kynhun ba 4 ngut hapoh ka jingïalam u Myntri ka tnad Water Resources katei ka jylla u Sukhbinder Singh Sarkaria, arngut ki MP bad u MLA ban wan sha Meghalaya ba ïakynduh ïa u myntri rangbah ka jylla u Conrad K Sangma lem bad ïa ki myntri jongu ban pynbeit ïa ki jingeh jong ki Harijan kiba sah ha Them Metor, Iew Mawlong.
Nalor u Sarkaria u ban ïalam ïa ka kynhun ki arngut ki MP Ravneet Singh Bitty bad Jasbir Singh Gilll bad u MLA u Kuldeep Singh Vaid.
Kane ka rai jong u Captain Amarinder Singh kala mih ruh halor ki khubor ba shah byrngem hiar thma bad siat ïap ki Jaidbynriew Harijan ha ka kynhun kiengatiar Hynñiewtrep National Liberation Council (HNLC) lada ki ialeh pyrshah ïa ka jingthmu jong ka Sorkar Jylla ban pynkynriah ïa ki na Them Metor, Iew Mawlong.
Kane ka kynhun ki Nongmihkhmat na Punjab kin sa ïakynduh ïa u Myntri Rangbah ka Jylla Conrad Kongkal Sangma bad kiwei kiwei ki myntri bad ki Ophisar ka Jylla ba dei khmih ïa ka shongsuk shongsaiñ.
U Amarinder ha ka shithi ba ula phah sha u Conrad Sangma ula pynpaw ïa ka jingsngew khia halor ka jingbyrngem jong ka HNLC bad ong “Kum kine ki khubor kila pynsngewkhia ïa ki paidbah ha Punjab namar kine ki longïing ki dei kiba la shong la sah ha Shillong wat hashuwa ba ka Ri kan ïoh ïa ka jinglaitluid”. Une Myntri Rangbah ka Punjab ula kyrpad ruh ïa u Conrad ban shim mardor ïa ki sienjam ba kyrkieh ban wanrah ïa ka jingsngew shngaiñ hapdeng ki Nong Punjab ba sah ha Jylla Meghalaya.
Haba kdew ïa ka jingkhia jong ka kam, u Captain Amarinder Singh ula ban jur ïa ka jingdonkam ban phikir bha haba khmih ïa kane ka ishu (pynkynriah ïa ka Them Metor) bad ban leh ruh da ka jingsngewthuh jingmut ka ban pynhun lang ïa baroh ki liang . Ula kdew ruh ba ka long kaba kongsan ban nym ailad ba kane ka kam kan ïakhleh bad ka niam ne sngew ïapher jaidbynriew.
Ha ka shithi, u Captain Amarinder ula pynkynmaw ruh ïa ka jingwan iuhkjat jong ka kynhun ka Sorkar Punjab ha Meghalaya, ha u snem bala lah, hapoh ka jingialam jong u myntri ka tnad Cooperation ha kaba la ïakynduh ïa u Conrad halor kane ka juh ka kam.
Kane ka kynhun ka la ïakynduh ïa ki Harijan ha Them Metor bad ïa kiwei kiwei ki Ophisar jong ka Sorkar Jylla, ha kaba la ai ka jingkular ba ka Sorkar kan nym pynkynriah satia ïaki.