Press "Enter" to skip to content

Pynkup burom ka KSU ïa saw ngut kiba pas SSLC ka Umrynjah Presbyterian SS

Shillong, Jylliew, 15: Ka Khasi Student’s Union (KSU) Umrynjah Unit kaba dei ka Unit kaba hap hapoh ka jylli treikam jong ka KSU Mawlai Circle ha ka 13 tarik mynta u bnai ka la pynkup burom ïa saw ngut ki khynnah skul jong ka Umrynjah Presbyterian Secondary School, kaba hap hapoh ka Mawlai Constituency kiba la pas ïa ka eksamin Secondary School Leaving Certificate (SSLC).
Ha kane ka sngi, ka seng ka la sam ruh da ki shatri sha ki khynnah jong kane ka skul bad kumjuh ruh ïa ki nonghikai.
La pynshngaiñ lang ha kane ka sngi da ka jingïadonlang jong ki dkhot ka KSU jong kiwei pat ki Unit bad kumjuh ki nongïalam jong ka KSU Mawlai Circle.
Ha ka jingïalang kaba lyngkot ba la pynlong ha ka kamra jong ka skul, u Bah B.Thangkhiew uba long u Nonghikai bad u Secretary jong ka School Managing Committee (SMC) jong ka skul u la pynpaw ïa ka jingsngewkmen kaba khraw ba ka KSU kum ka sengbhalang ka la kynmaw ban wan jngoh ïa ka skul bad ban noh jingïarap lang wat la i long i jingai barit.
U la ïathuh ba katkum ka jingbuh jingthoh, la seng ïa ka skul la seng ha ki snem 1960 shaneng tang ha ing phlang barit bad da ka jingtrei shitom jong ki dkhot ka SMC bad ka jingïai shah jong ki nonghikai wat hapdeng ka jingsiew tulop kaba rit ki la kloi ban len lade bad ban shakri ïa ki khynnah skul na ka bynta ban bsa ïa ka jingnang jingstad.
Ula ïathuh ruh ba kane kan dei ka sien ba nyngkong ba ka skul kan ïoh jingïarap bad ban pynkup burom ïa ki khynnah ba la pas ïa ka eksamin SSLC da ki Sengbhalang.
Ha ka juh ka por u la la kyrpad ïa ka KSU Umrynjah Unit ba kan ïarap lang ïa ki ha kino kino ki jingeh kiba ki ïakynduh.
U Rangbah Shnong ka Umrynjah haba kren ha kane ka jingïalang u la pynpaw ïa ka jingsngewnguh bad ai ruh ïa ka sneng ka kraw bad ka jingkyntu kynpham ïa ki dkhot ka Umrynjah Unit ban ïaid ha ka lynti kaba dei bad kaba tipbriew tipblei.
Ha kane ka sngi la ïoh ruh ïa ka jingkren na u General Secretary KSU Mawlai Circle u Samla Rapborlang Nongrum bad na u President KSU Mawlai Circle u samla Samla Biangbor L.Paliar. Kine ki arngut ki nongïalam jong ka KSU ki la pynpaw ïa ka jingkmen kaba khraw ba tang hadien katto katne bnai ba la pynkha ïa kane ka shnat treikam ka la lah ban pyni ïa ka jinglong tbit bad jingshemphang jong ki ban shakri ïa ka imlang ka sahlang bad kumjuh ïa ka ri bad ka jaidbynriew hi baroh kawei.
Ki la kyntu ruh ïa ki nongïalam bad ïa ki dkhot ka KSU Umrynjah Unit ba kim dei ban long ki mawjynthut ïa ka shnong ka thaw hynrei ki dei ban long ki sharak ki ban tbeh jingshai ïa ka jaidbynriew bad ba kin long kiba kloi ban ai ka jingïatreilang lang bad ka Dorbar shnong,ka Seng Longkmie bad kumjuh ruh bad ka Seng Samla.
Ki la kyntu ruh ïa ki khynnah skul ba kin long kiba minot ba kin long kiba stad namar ha kane ka juk kaba mynta ban ïakhun ïa kino kino ki jingeh ka donkam ïa ka jingstad bad ka jingnang jingtip.
Na ka liang kine ki nongïalam ki la pynpaw ba ki long kiba kloi ban ai ka jingïatreilang lang bad ki bor pynïaid shnong kumjuh bad ki bor ba pynïaid ïa katei ka skul ha kano kano por ba ki donkam ïa ka Seng na bynta ki kam babha bad na ka bynta ki dawbah dawsan jong ka jaidbynriew baroh kawei.