Press "Enter" to skip to content

Rai sangeh treikam ki doktor NEIGRIHMS 17 tarik, pynrem jur ki doktor Nazareth

Halor ka jingshah shoh ki doktor ha West Bengal

Shillong, Jylliew 15 : Ki doktor jongka North East Indira Gandhi Regional Institute of Health and Medical Sciences (NEIGRIHMS) hapoh ka lama Resident Doctors Association (RDA) bad kumjuh ruh ki doktor na ka Nazareth Hospital ki la pynrem jur ïa ka jingshah shoh jong ki doktor khynnah khamtam u Dr P Mukherjee jong ka hospital NRSMCH, Kolkata tang na ka daw ka jingiap jong uwei u rangbah uba ïoh ïa ka jingpang “ Heart Attack”. Halor kane ki doktor ka NEIGRIHMS ki la rai ban sangeh treikam ruh ha ka 17 tarik mynta u bnai kum ka jingïasnoh kti lang bad ki doktor kiba ïakhih ha kylleng ka ri hapoh ka lama Indian Medical Association.
Kat kum ka jingpyllait khubor na u President ka NEIGRIHMS-RDA i Dr Synrang Batngen Warjri la pynpaw ba kane ka jingleh riewkhlaw jong ki briew pyrshah ïa ki doktor ba ai jingsumar bad ka jingbym shim khia
jong ka sorkar West Bengal ban kem ïa ki briew kiba donkti ka long ka bym lah ban pdiang da lei lei ruh. “ Ngi dap da ka jingkyndit bad sngew bitar ïa kane ka jingjia bad jingleh shilliang khmat ka sorkar ban ym ïada ïa ki doktor kiba trei ha katei ka hospital ha West Bengal” ong ka kyrwoh na u President.
Kum ka dak ka jingsngewlem, sngew pyrshah jur bad ïasnoh kti lang ban pyrshah halor ka jingjia, ki doktor ha NEIGRIHMS ki la pynlong ruh da ka jingïa ïaid paidbah ryngkat ka jingthang mombati ha ka janmiet Sngi Thohdieng.
Kumjuh ruh na ka liang ki doktor jongka Nazareth Hospital ha ka jingpyllait khubor na u MS Chief Medical Officer katei ka hospital Dr Gordon Rngad mynta ka sngi la pynpaw ba ki doctor bad kiwei ki nongsumar kiba don hapoh ka Hospital Nazareth ki kwah ban pynpaw ïa ka jingsngewsih kaba khraw haba ki ïohsngew ïa ki jingjia ba khah khah kum ka jingshah shoh bad shah pyniap jong ki nongsumar hapoh la ka jong ka ri. Lehse bun na kinongpule ki la tip shaphang kawei ka jingjia ha kaba uwei uba kham tymmen u ïoh “heart attack” bad u la iap ha kawei ka hospital ha Bengal. Hadien kane ki nongleh dusmon ki la pynmynsaw jur ïa u doctor khynnah da kaba ki shoh ïa u na ka bynta ka khlieh bad kiwei ki bynta jong ka met. Kaba sngewsih ba kum kine ki la nang jia khah khah ha ka Ri India, ba lada iap u nongpang, ka dei beit ba ki doctor ki lah leh bakla, te ki pynmynsaw ïa ki ban pynhiarkput, bad pynjot ïa ka hospital.
“Hooid ngam ong ba ngim ju bakla bat ïoh don ruh ba khlem sumar bha, hynrei u paidbah u don hok ban rah sha ka aiñ ban pynshitom ïa ki ne ka hospital. Mynta imat ka dei ka aiñ jong ka jingleh jubor, bad ym dei ka aiñ jong ka Ri” ong I Dr Rngad.
“Kane ka jingpynpaw ka lah ban ym paw ne poi sha kiwei pat ki bynta jong kane ka Ri baiar , hynrei ngi pynpaw hangne ha ka jylla jong ngi, da kaba sngewnguh shibun ia ki paid nongshongshnong jong kane ka jylla,ba kiba bun ki jaidbynriew jong ngi ki sngewthuh,bad ïaid ha ka lynti kaba dei.Ngi kyrmen ba ka Sorkar kan shim khia ban pynthikna ba ka aiñ jong ka Ri kan synshar bad ba ki briew kin burom ïa ka hok long briew man briew, ba ki nongshongshnong jong ka Ri kin sngew shngaiñ” Pynkut ka kyrwoh na I Dr Rngad.