Press "Enter" to skip to content

Ym don kawei ruh ka Tour Operator na Meghalaya ba pan CoA na ka tnat Tourism

Shillong, Jylliew, 15: U Regional Director jong ka Ministry of Tourism u Sankha Subhra Devbarman mynta ka sngi saitjaiñ u la ïathuh ba ym don satia wat tang kawei ruh ka Tour Operator na ka Jylla Meghalaya kaba la wan sha ka miej jong ka Ministry ban pan ïa ka Certificate of Accreditation.
Haba kren ha ka jingïalang kaba la long bad ki nongpynïaid Hotel, ki Tour Operators bad ki Travel Agents mynta ka sngi ha nongbah Shillong, u Devbarman u la ïathuh ba kane ka ka Certificate of Accreditation ka dei kaba kongsan haduh katta katta lada ki kwah ban pynheh shuh shuh ïa ka kam jong ki. U la bynrap ruh ba ka jingpynpaw pyrthei ïa ka kyrteng jong ka shlem treikam ka long kaba donkam bad ïa kane lah ban leh lyngba ka Ministry.
U la ïathuh ba ka Ministry ka angnud haduh katta katta ïa ki kam jngohkai pyrthei ha ka jylla Meghalaya. Une u Regional Director u la ïathuh ba ka Ministry ka don bun tylli ki skhim bad u la kyntu ruh ïa ki kynhun bapher bapher ba kin mih shakhmat bad ban shim kabu ïa kine ki skhim kiba bun kyrhai ha kane ka Ministry.
U la ïathuh ruh ba u Myntri ka tnat Jngohkai Pyrthei ka Sorkar India un sa wan iuhkjat ha kane ka Jylla ha ka 21 tarik mynta u bnai, kaba ïahap ruh bad ka jingrakhe ïa ka Yoga day.
U President jong ka Federation of Shillong Hotels u la kubur ba ki Tour Operators na ka Jylla ki ju rejistar ïalade bad ka Ministry of Tourism. “Ka daw kaba pynlong ïa ngi ban ym rejistar shuh mynta la bun bun snem ka dei namarba ka jingrem shaba palat ka bai rejistar,” u la ong.
Ha kajuh ka por u la ïathuh ba dang khyndiat sngi ka Ministry ka la shim ïa ka rai ban pynjynsur noh ïa ka bai rejistar na ka bynta ka thaiñ Shatei Lammihngi.
“Nga kymren ba kane ka jingpynjynsur kan ïarap ïa ngi ba ngin rejistar ïalade bad ka Ministry da kaba jingmut ruh ba ka long kaba kongsan haduh katta katta ban pynkiew bad ban kyntiew ïa ka iew jngohkai pyrthei ha ka jylla,” ong une u President.