Press "Enter" to skip to content

Shano ki nongsumar ïa ki jaka jngohkai pyrthei ha Meghalaya?

Philip Marweiñ,
Shillong-2.
Baroh ki jaka kiba itynnat kiba khring ïa ki nongjngohkai pyrthei ki dei ban don la ki jong ki jong ki nongpeit nongjngoh bad ki nongsumar, khnang ba kin neh kin sah ha ka jingitynnat jong ki, bad ba kin long borabor kiba khuid ba suba. Katkum ka jinglap jong nga, bun ki jaka jngohkai ha Ri India bad wat ha ka jylla Meghalaya, kiba kham itynnat bad kiba khuid ba suba, ki dei kito kiba don la ki jong ki nongsumar kiba kitkhlieh ïa ki jaka jngohkai (tourist spots).
Nalor ba kine ki jaka ki long kiba itynnat ban peitkai bad ïaidkai, ki long ruh kiba khuid ba suba. Shuh shuh, ki don ki dukan bamja, dihsha, kiwei kiwei ki dukan tiar ba donkam ki nongwan jngohkai, ki don ruh ki hotel ne ki ïingbasa ba sahmiet ki Tourist. Kane ka nang kyntiew shuh shuh ïa ka jingwan boi ki tourist bad ka wanrah ïa ka jingïohnong kaba jur ïa ki trai jaka lane ia ki nongpeit nongjngoh, nalor ka ai kam ai jam ruh ïa ki paidbah, khamtam ïa ki samla ba khlem kam.
Ka jingkhie spah na ka jingwan ki tourist ka wan nyngkong nyngshap eh ka dei ka jingitynnat ki jaka bud sa ka jinglehkhuid ïa ka jaka bad ban buh ïa kiei kiei baroh ba ki tourist ki donkam. Wei ba ki jaka ki biang nadong shadong bad ki khring bha ïa ki nongjngohkai pyrthei, kita ki jaka ki la ïoh lypa ïa ka jingieid bad jingsngewtynnad jong ki (tourist). Ha Meghalaya, ki don bun ki jaka kiba ka mariang kaba la kyrkhu kyrpang bad ki long kiba itynnat da shisha hynrei, kam pat biang tang ka jingitynnat jong ki jaka, dei ban don la ki jong ki jong ki nongkhmih nongpeit bad nongsumar kiba long trai bad ka jingsngew trai ban nang pynbha shuh shuh ïa ki jaka. Kine ki trai jaka bad nongsumar ki dei ban nang bad tbit kumno ban sumar ïa ki jaka ban khring ïa ki tourist khnang ban wanrah jingmyntoi, ym tang ha ka ïoh ka kot, hynrei ha kiwei kiwei ki rukom kum ka jingïa-ithuh ithaw bad ïateh lok bad ki tourist kiba wan na kylleng ka Ri bad ka pyrthei.
Ka jingïalong paralok bad ïateh lok ka long kawei na ka jingïohnong bakhraw eh ha ka kam jngohkai pyrthei (Tourism). Ki jaka ba itynnat khlem ki trai ne ki nongpeit nongjngoh ki long tang ki jaka ba thylli khlem jingmyntoi (ri kynjah). La kyntu, namarkata, ïa ki trai khyndew jong ki jaka jngohkai ba itynnat jong ka jylla, ba kin kitkhia bad sumar sukher ïa ki ban ïai-khring ïa ki tourist baroh shi lynter. Lada kim nang ne sngewlah ban leh kumta, ai ba kin aiti noh (aiwai) ïa kine ki jaka ha kiwei kiba lah bad kiba nang ban pynïaid khnang ba ka Tourism ha ka jylla kan roi.