Press "Enter" to skip to content

Shimti u Amit ha ka jaka bah Gideon kum u Secy

Pynthymmai nongkit kam ka Shillong Cricket Association
Shillong, Jylliew 16: Ka Shillong Cricket Association, hynnin ka sngi Saitjaiñ, ka la leit sha ka jingïalang ban pynthymmai ïa ki nongkit kam ki jong ka.
Ka khubor na kane ka jingïajied nongkit kam ba thymmai ka long ba ka kam Secretary kaba la bat ïa ka la kumba 13 snem da u bah Gideon Kharkongor, mynta ka kynti ka la leit noh pat sha u Amit Shingania.
Haba ïakren bad u Mawphor, u bah Gideon, u pynpaw ïa ka mynsiem kaba kmen ba wat lada ka jing-ïalang kam shym la jied shuh ïa u ban dang bat ïa ka kam Secretary, hynrei u sngew hun pat ha ka jingim, namar ha ki 13 tylli ki snem kiba u la shimti ïa ka kam, baroh u la lah ban pyndep kat kum ka jingdawa jong ka por.
Ha ka jingïakren, u bah Gideon u pynpaw ba ki kam kiba u la lah ba un pyndep ryngkat bad ka kynhun kaba u la don lang ki long ka jing-lah ban pynkylla ïa ka madan ïalehkai (pitch) kaba juh ïalehkai da kaba siang karpet hynrei la pynkylla ïa ka sha ka madan ïalehkai kaba pura (turf pitch).
Hynrei ka kam bah kaba la lah eh ba un pyndep mynba u dang bat kum u Scretary ka dei ka jingpyn-kha pat sa ïa kawei ka kyrdan ïalehkai ka Shillong Cricket League ka lympung ïalehkai jong ka Super Division, ban bynrap da ka jingpynrung ïa ka rukom ban pynïalehkai da ka innings.
“Ka jingpynrung ka jong ngi ïa ka rukom ïalehkai innings ka dei ka sien ba nyngkong ha kane ka jylla hadien 30-40 snem, namar ngi tip ba kane ka rukom ïalehkai ka long kaba donkam bha ban pyn-rung ha ki khun samla ki jong ngi” la pynpaw u bah Gideon.
Nalor katta u bah Gideon u kam ruh ba ka kynhun kaba la leit noh ka la lah ha kaban kam pat sa ïa uwei pat u mawmer naka bynta ka SCA bad kane ka dei ka jingsdang ïa ka shlem ai jinghikai ba tip ïa ka kum ka Shillong Cricket Academy, kaba u bah Gideon u bat kum u Techinical Director u jong ka.
Kane ka shlem ai jing-hikai ka SCA ka dei ka kynhun treikam kaba laitluid (autonomous) ba la ithuh da ka Meghalaya Cricket Association.
Nalor katta ki shalyntem jong ka lympung ïalehkai ka SCA ha ki snem ba la leit noh ki long ka jinglah ban pynlong tista ïa ki lympung ïalehkai jong ka Inter School Cricket, Inter College.
Ki nongkit kam ba thymmai ka SCA ki long President: Naba Bhattacharjee, Vice President- Peter, Macdonald Kharsawian, Vikram Singhania, Biswajeet Das, Manik Das, General Secretary: Amit Singhania, Treasurer Dhruba Thakuria, Assistant General Secretary Banri Kharmalki, Joint Secretary Roof Nongsiej, Neetesh Sharma, Md Junaid.
Ki Executive Members ki long Purojit Mondal,Mr Shiningstar Lyngdoh, Mr Arun rai, Mark Ingty, Robert Z Ralte, Pynhunlang Kharnarbi, Eugene K Kharsyntiew, Peter O Lyndem