Press "Enter" to skip to content

(title)

Shillong, Jylliew 17 : U Chief Justice ka Meghalaya High Court ha ka sngi Nyngkong u la hiar hi dalade sha Umroi Airport ban jurip ïa ka jinglong jingman hangtei khamtam eh haba iadei bad ka jingtreikam katei kad liengsuiñ kaba don ha Umroi.
Kadei ruh ka sien kaba nyngkong ba u Chief Justice jong ka High Court un leit ban jurip ïa ka kad liengsuiñ hadien ba ka Iing Bishar ka la shimkhia hi halor ka jingpynslem ban pyntreikam pura ïa katei ka kad liengsuiñ ha Umroi.
Haba kren bad ki lad pathai khubor hadien ka jingjurip ïa ka kad liengsuiñ, u Chief Justice u la ong, “Ngi la wan jngoh bad la iakren ruh bad ki bor pynïaid halor ki jingeh ba ka ki kynduh. Kumta, ngin sa ai ïa ka rai ha ka sngi Nyngkong hadien ka PIL.”
Katkum ka jingïathuh jong u Regional Executive Director ka AAI, u Sanjeev Jindal la ong ba ka jingwan jurip jong u Chief Justice kadei shi bynta jong ka mukoduma bad dei na kata ka daw u kwah ban iohi matkhmat ia ka kad liengsuiñ.
U la kubur ruh ba ka Indigo ka kwah ban wan kamai nangtei tangba u ong pat ba ki liengsuiñ hi ki kham phaikhmat shwa sha ki jaka treikam kiba kham suk ïa ki. Shwa kane, u la ong ruh ba bunsien hi ki bor pynïaid liengsuiñ ki kham noh shwa sha kito ki jaka ba khamsuk, khamtam ha ki jaka ba la don lypa ki ophis treikam bad khamtam eh kiba biang ïa ki nongleit nongwan.
Nalorkane, u Jindal u la ong ruh ba shen ki kad liengsuiñ kiba don ha ka thaiñ shatei lam-mihngi jong ka Ri kin sa ïoh noh ban kit wat ïa ki tiar (cargo) khnang ban pynsuk ïa ki nongleit nongwan watla shwa ban pynurlong ïa katei, ki hap ban ïaid bun pat ki kyndon.
“Kino kino ki liengsuiñ kiba kamai khlem ïoh kit tiar ka mut shi bynta jong ka thong treikam jong ki ka la duh noh. Hynrei ban leh ïa kane pat donkam ïa ka kor ba long kum ka mashin x-ray kaba shongdor palat 50 lak,” u la bynrap shuh shuh.
Shuh shuh u ong ruh ba ha ka 24tarik u Jymmang ki la ïoh ruh ïa ka laisen ban pynher wat ïa ki liengsuiñ kiba kham heh (3C category). “Kumta ki liengsuiñ 3C ruh ki lah ban noh khyndew lada ki kwah.” Nalorkata, u ong ruh ba ka AAI kan sa thoh sha baroh ki tnad liengsuiñ ban pyntip ba ki la la ïoh ïa ka 3C category licence.
Katkum ka jingïathuh jong u, tad haduh mynta hi dei tang ka Alliance Air jong ka Air Indïa kaba dang pynïaid ïa ki liengsuiñ na Umroi sha Kolkata kaba ngiam tang kumba 76 ngut ki nongleit nongwan.
Ha kane ka jingjurip la donlang ruh naduh u Justice HS Thangkhiew, u Advocate General, ki heh na ka Airports Authority of India (AAI) nalor kiwei kiwei.