Press "Enter" to skip to content

Bym don TL, khang tala ka KHADC ïa ka ophis treikam ka Swiggy

Da ka kuna yn pyn-ap ïa kiba pynkheiñ aiñ
Shillong, Jylliew 17 : Ka Khasi Hills Autonomous District Council (KHADC) Enforcement Wing ha ka sngi Nyngkong ka la khang tala noh ïa ka ophis jong ka kompeni BUNDL Technologies Private Limited Company ba la tip kum ka Swiggy, halor ka nongrim ba katei ka kompeni pynpoi jingbam ka treikam ha Shillong khlem da aplai satia ïa ka Trading Licence na District Council.
“Ngi la ïoh pdiang bun bha ki jingujor halor kane ka kompeni kaba treikam ha Shillong khlem da ïoh ïa ka Trading Licence na ka
Council bad haba ngi tohkit ngi lap ba kane ka kompeni kam don shisha ïa ki kot ki sla kiba biang bad ba ka la shu treikam beaiñ ha ka nongbah. Na kata ka daw ngi la hap khang tala noh ïa katei ka shnat treikam kaba don ha Dhanketi,” ong u Bah Hillman Syiemlieh, Assistant Superintendent, Enforcement Wing KHADC haba kren bad ki lad pathai khubor.
Da kaba kdew ba ka long kaba donkam ïa ki bym dei riewlum ba kin hap ïoh shwa ïa ka Trading Licence na ka Council shwa ban sdang ïa ki lad kamai ne ka kam khaïi pateng ha u pud u sam jong ka, u Bah Syiemlieh u la ong ruh ba katei ka kompeni ka treikam man ka sngi ha ka nongbah khlem aplai satia ïa ka laisen.
Ha kajuh ka por, u Executive Member (EM) ka tnad Trade, Bah Paul Lyngdoh u la ong ba katei ka kompeni ka la sdang ban treikam ha u pud jong ka Council naduh u Lber mynta u snem. “Ngi la ïoh pdiang ïa ki jingujor bad haba ngi buddien ngi lap ba ka Swiggy ka treikam beaiñ khlem Trading Licence na ka Council.”
Da kaba kam ba ki don haduh 100 ngut ki nongtrei ha katei ka kompeni kiba ju leit pynpoi ïa ki jingbam sha ki iing briew, u EM u la ong ruh ba kitei ki jait kompeni ki donkam ban tip ïa ki kyndon kiba don haba ki wan ban treikam ha u pud u sam jong ka Council ym ban shu leh katba mon.
“Ngin ïaid beit katkum ka aiñ Trading by Non-Tribal Regulation Act, 1954 bad ka Rules 1959. Kan ym don ruh ka jingleh shilliang na ka tnad. Ha kajuh ka por ngi pynshlur ïa ki trai jylla ba kin mih shakhmat ban sengkam la jong katkum ka jinglah jong ki,” bynrap shuh shuh u Bah Paul.
Katkum ka jingong u, ki don ki briew na shabar jylla kiba wan ban pyniar ïa ka kamai kajih ha ka nongbah khlem da pynbiang satia ïa ki kot ki sla. Hynrei mynta pat u la ong, “Ka Council kan pyrkhing jur ryngkat ka kuna ïa kino kino kiba pynïaid ïa ka khaïi pateng jong ki khlem da ïoh jingbit na ka Council katkum ki kyndon ba la buh.”
Nalorkata, u ong ruh ba ka jingai jingbit (NOC) na ka shnong nangne shakhmat kam dei shuh tang na u Rangbah Shnong hynrei kadei beit da ka rai jong ka Dorbar Shnong. U ong ruh ba ka Council kan pdiang ïa ka NOC jng ka Dorbar Shnong tang lada ka don ïa ka jingsoi jong u Rangbah Shnong, Secretary, nangta jong u Syiem ka Hima na ka bynta kino kino ki ïew Hima. Nalorkata, u ong ruh ba kitei ki NOC kin dei tang na ka bynta lai snem ka samoi treikam.