Press "Enter" to skip to content

Dang pynkhlaiñ ka HYC ïa ka jingshakri da kaba pynkhna bun ki shnat treikam

Nongpoh, Jylliew : Da ka jingangnud ban pynkhlaiñ ïa ki ka kam shakri ban peit ïa ka eh ka shon ki piadbah ka Bri u Hynñiewtrep, ka Hynñiewtrep Youth Council, Ri Bhoi District mynta ka sngi Saitjain ka la lah ban dang pynkha ïa kawei pat ka shnat treikam ba la tip kum ka HYC Erpakon Unit, ha kaba ki nongïalam ka HYC na ka District ki la leit ban pynskhem kum ki nongïalam bad ki dkhot ba pura ka seng.
Ïa kane ka jing pynskhem ïa ki nongïalam ka HYC Erpakon Unit la wanban pynskhem da u General Secretary ka HYC, Ri Bhoi District, u Samla Hercules Suting bad la sakhi lang ruh da ka jingdon lang u Vice President, u Samla Jason Lennox Nongrum, ki nongïalam na ka Nongpoh Circle bad kynthup ruh kiwei kiwei ki dkhot nongialam ka seng na ka District.
Kitei ki nongïalam ka HYC Erpakon Unit ki kynthup ïa u President, u Samla J. Nongdhar, vice President, u Samla W. Dewkhaid bad u samla Lebister Syiemiong, General secretary, u samla L. Syiem, Publicity Secretary, u Samla Rishankupar Nonglang, Organizing Secretary, u Samla Neverson Marbaniang, Education Secretary, u samla Kerboklang Rinbon, Sport Secretary, u samla Kyntiewbor Nonglang bad kynthup kiwei kiwei ki dkhot ka Executive Committee.
Ïa kine ki nongïalam la pynskhem ha ka jingialang kaba la long ha ïing Dorbar Hall ka Shnong Erpakon, ha kaba u General Secretary ka HYC na Ri Bhoi, u Samla Hercules Suting u la shim ka bynta ban pynsmai ïa kitei ki nongïalam katkum ka riti treikam ka seng.
Haba kren ruh ha kane ka jingialang pynskhem ïa ki nongïalam, u Samla Herculer Suting kum u General Secretary ka District u la ong ba ka daw kaba la pynlong ïa ka seng ban dang pynkhlaiñ ban thaw ki shnat treikam ka dei na ka daw k ajingangnud ban pynkhlaiñ ïa ka jingshakri na ka bynta ban peit ïa ka eh ka shon ki paidbah ha ka jylla.
U la ong ruh kumba long haduh mynta ka seng ka la leit bad hiar kylleng ki thaiñ ka Bri u Hynniewtrep ha kaba na ka por sha ka por la dang lah ban pynkha ïa ki tnad treikam bad ka seng ka khmih lynti da ka jingbun ki shnat treikam ki nongïalam kin shim ïa ka lyngkor nongialam ban kit ban bah ïa ka eh ka shon ka jaid bynriew.
“Kumba long haduh mynta ka jaid bynriew jongngi ka don hapdeng ka saw ka sian ha kaba wat ki mynder ne ki bar jylla ki la sdang ban leh trai khlieh ha ka jaka ka puta jongngi” u la ong bad ka seng ka kmih lynti bad angnud ba ka jingpynkhlain ïa ki shnat treikam kan iarap ban ïada ïa la ka hok jong ki paradoh ki para snam” u la bynrap.
U la ong ruh ba ka seng ka don shibun ki nongrim treikam khamtam ka seng kan shim khia ruh halor ka jingeh ki paidbah ha kaba ia dei bad u Pud u sam ba ka jylla haduh mynta kam don ïa la u pud u sam bad na ka liang ka seng ka la rai ban tur shaphrang ban iaid dawa na ka sorkar ba la dei ka por ba kan pynbeit noh ïa u pud u sam ha pdeng ka Meghalaya bad ka Assam.
Namarkata, u la buh ruh ka jingkyrpad ïa ki nongialam ba thymmai ba kim dei ban shim kabu ban wan rung sha ka seng tang ban ioh jingmyntoi shimet, hynrei kum kita ki paradoh ki parasnam ki dei ban sngewkhia ban trei borbah na ka bynta ka dawbah ka jaid bynriew kaba ngi dang donkam ban pynkhlain bor da ka jingiatrei lang ki nongialam ryngkat ki paidbah ka bri u Hynniewtrep, u la bynrap shuh shuh.