Press "Enter" to skip to content

Ka Jingïatylli! Ka Jingïatylli!! Shano ka Jingïatylli ka don?

I. R. Dkhar

Bunsien la ju ïakren sharum shaneng halor ka jingïatylli jong ka jaidbynriew jong ngi bad shibun la pynmih ruh ki jingthoh lyngba ki Kotkhubor halor kane ka phang. Hynrei kam poi shano shano ruh.Dang shen la kdew ha kawei na ki jingthoh kaba la thoh da I Bah Diton John Wahlang, Lumshyap Shanmari Golflink, kaba la mih ha u Mawphor, kaba ong “ka jingbynriew ka la nang shah pharia ha ki bun ki rukom”. Kane ka long ka jingthoh kaba dei shisha ban don ka jingpyrkhat jong ngi kum ka jaidbynriew Khasi-Pnar. Ka jingbym ïatylli ka la dei shisha kata ka raibi kaba la shong tynrai ha ka jaidbynriew jong ngi.Kine harum ki long katto katne ki daw kaba pynlong ïa ka jingbym ïatylli jong ka jaidbynriew:
1. Ka jingsngew ïapher ka jinglong u Khasi, u Pnar, u Bhoi bad u War. Ka ktien ka ong “Khyriam u Pnar, u Bhoi U War, u dei u paid Khasi baïar” kumba la thoh u Myllung Soso Tham. Haba u Khasi u leit trei sha Jaiñtia, la kheiñ ïa u ba u long u nongwei. Kumjuh haba ki Pnar ki wan sha Shillong, ka don kato ka jingsngew ba ki dei ki synteng. Phin peit ha kaba ïadei bad ka kam ka jam, lada u Khasi u leit trei sha Bhoi, kum sha Nongpoh ne Umsning, ki briew jong ka thaiñ Ri Bhoi, ki kheiñ nongwei bad ki kwah ban kyndang ïa ki khnang ba kin ai kam ïa ki para bhoi jong ki. Kumjuh lada wan ki bhoi sha ri Khasi bad lada leit ki Khasi sha Jaiñtia Hills District, ki nong Jaiñtia ki kheiñ nongwei ïa ki Khasi bad ki sngewpher bad thaw lad lad ruh ha ka jingmut jingpyrkhat jong ki pyrshah ïa ki bad ki kwah ban ai ïa u briew la jong.
2. Ka ktien ka thylliej ka dei kawei kaba wanrah ka jingïatylli jong ka jaidbynriew. Ka ktien Khasi kaba dei ban long ka ktien pdeng, kam don ka jingpyndonkam pura ïa ka, la ka dei ha kano kano ka district ne ha kano kano ka jaka jong ka Jylla baroh kawei. Ka ktien khasi bad ka jingkren ïa ka, ka la dei ban long salonsar ha ka Jylla baroh kawei. U Khasi (Khyriam), U Pnar, U Bhoi, U War, u dei ban don ka ktien pdeng kaba dei ka Ktien Khasi, ka ktien jong ki lah ban kren tang ha la ïing la sem, ym shabar. Lada u Khyriam u leit sha kano kano ka bynta jong ka Jaiñtia, la dei ban kren beit da ka ktien Khasi, kumjuh lada leit sha West Khasi, Ri Bhoi, sha War Jaiñtia bad kumta ter ter.
3. Ka jingmih bun palat ki Seng Bhalang kum ki tit, ka wanrah ka jingïapher jaidbynriew. Ngin peit ha man la ki jaka, shnong, ki distrik, min ki Seng Bhalang kum ki tit. Tang shu pher tiak, la bun ki kynhun ïaleh ne ïakhun ïa ka Sorkar ban pynïoh ne pyrshah ïa kano kano ka jingdawa. Sha East Jaiñtia Hills mih ka East Jaiñtia National Council, Central Executive Committee, etc. Nangta mih saka Hynñiewtrep Achik National Movement, East Jaiñtia Hills, nalor kiwei kiwei. Sha West Khasi Hills ruh kumjuh, mih ki Seng Bhalang bym tip shuh.Ka jingmih palat ki Seng Bhalang bad ka jingtuklar palat jong ki ha ki distrik Khasi Hills, West Jaiñtia, East Jaiñtia, West Khasi Hills, South West Khasi Hills bad Ri Bhoi District ka nang pyni ïa ka jingsaphret. Balei nga ong ïa kane, namar kato ka Seng Bhalang kaba mih, lehse dei na kano kano ka daw, ka peit tang ïa kata ka kynhun jong ki. Hynrei ka la don lypa ka Seng Bhalang kum ka Hynñiewtrep Youth Council, FKJGP, bad kiwei kiwei, kiba dei ban peit ïa ka Jylla baroh kawei, la hakano kano ka khia ka shon. Ka Seng Samla Pule ka la don lypa da ki phew snem kaba peit ïa ka Jylla baroh kawei.
Kum ka nuksa, ha Assam ka don ka All Assam Students Union bad kane ka AASU ka peit ïa ka Jylla Assam baroh kawei, katba ki don ki tnat ha ki distrik bapher bapher kaba ïatreilang bad ka Seng Kmie. Hynrei hangne ngi ïohi ba nalor ka KSU nang mih pynban kiwei kiwei ki Seng, kum ka Jaiñtia Students Union, West Khasi Students Union, RBYF, etc. etc.Ka KSU ka la dei ban long tang kawei bad ha kiwei pat ki distrik jong ka Jylla ki la dei ban don tang ki Branch. Bad lada jia eiei, kato ka Branch kan ai jingtip sha ka Seng Kmie bad kin ïatreilang na ka bynta ka jingbha lang. Haba bun palat ki Seng, ki mih ki jingbymïahap ne jingsngewpher hapdeng jong ki. Bad kawei ka Seng ka ñiat sha kawei pat, bad kawei ka Seng ka thet la ka jong ka kti lada don kano kano ka jingjia sha kiwei pat ki jaka ne distrik ki bym dei hapoh ka jaka ne distrik jong ki.
4. Ka jingmih ki Seng Saiñ Hima kum ki tit, ka wanrah ïa ka jingsngew ïapher bad ka jingïapait ïapra ha ka jaidbynriew.Kumba ngi tip, nalor ka UDP, mih sa ka PDF – ka Seng thymmai. Ngam tip yn mih sa kaei. Kine ki party ki pyni ïa ka nuksa jong ka jingpait bad jingbym ïatylli ka biah phongrai pat ïa ka jaidbynriew. Ngi la ïakren bunsien balei ki Seng Riewlum kim ïatylli noh kawei ban ïaleh pyrshah ïa ka Congress ne BJP ne kiba dei ki National Party. Hynrei kam poi shano shano ruh. Ka jingkwah jong u paidbynriew Khasi, ka la shu long kam kai, katba ki Seng Saiñ Hima Sima pat ki ïaid la ka jong. Hangno ka nuksa kaba ki ai?
5. Ha kane ka por mynta, la ïohi kam don ka jingïatylli hapoh shnong poh thaw. Lada don ka jingïap briew, ka don ka jingpeit shiliang. Kam don ka jingkitkhia jong ki Dorbar Shnong, hynrei la shu ieh beit ha kiba ha ïing ha sem bad ki trai ïing. Ki trai ïing kiba bun kiba haïing hasem, ka jingïatur ïabeh ka long beit para maki, hynrei lada ïap u baduk, ki bahaïing hasem ki shem jynjar haduh katta katta. Ka don ka jingïapeit shiliang khmat para shong para thaw. Kane ka ju jia bha hapoh Sor namar ka jingsngew standard ne ka jingnang jingstad. Sha nongkyndong ka kham pher namar ngi ïohi bad lap ba kim ju kheiñ niam. La ju ïa ong bad ïa khana ba hana ha kane ka juk mynta, ym don por shuh ban ïabeh ha ka ïap ka im jong ki para shong para thaw. Hynrei ka dustur u Khasi kam dei ban long kumta, ka jingïabeh ïatur bad jingïarap bad jingsngewlem para briew ka dei ban don beit, khlem kheiñ ïa kiba don shisha ki khep ki bym lah kiar ha ka long briew man briew.
6. Ka jingsngew niam ruh ka dei kawei kaba wanrah ïa ka jingbym ïatylli jong ka jaidbynriew. Haba don ka jingïap briew, kiba long Katholik, leit dang kiba long Katholik, lada ïap briew kiba long Presbyterian, leit tang kiba long Presbyterian, kum ka nuksa. Nangta,ym don ka jingkitkhlieh, jingkitkhia jong ki Dorbar Shnong (khlem kynthoh pynrem ïano ïano kiba don shisha ki Dorbar Shnong kiba kitkhia ne bahkhlieh). Ka jingshisha ka long ba lada ki Rangbah Shnong (khlem pep bad ka kynhun EC jong ki), ki ïadon bynta, ka don ka maiñ, ka iktiar, ka jingñiew burom jong ka shnong ka thaw bad ki para shnong para thaw ruh ki sngew ba dei ban ïa mih bad ïashim bynta namar ki Dorbar Shnong ki pyni ïa la ka nuksa. Kam dei ban kheiñ niam, niam ka dei ban long la ka jong bad ka jingsngew ne jingïarap para briew ka long la ka jong. Ka niam ka dei ban ïaid la ka niam, hynrei ym dei ba ka niam kan pyntud ne pynthud noh ïa ka jingsngew briew.
Kitei haneng ki long tang katto katne ki daw ba balei ba kat nang mih ki sngi, ka jingïatylli jong ka jaidbynriew Khasi ka nang troiñ. Bad ka burom ka akor para briew, khamtam ha ki samla mynta ka nang jah rngai kumba la hikai da ki longshuwa manshuwa. Bad lada ngi kwah ban wanrah ïa ka jingïatylli hapoh ka jaidbynriew, la dei ban pynbeit noh ïa ki jingduna bad ban sdang thymmai noh nangne shakhmat. Kane ka long tang ka jingpyni lem ïa ka jingsngew bad lada ka dei kaba bakla, wat ym ïabat ne ïathew ïawoh. Hynrei lada ka long kaba dei, ai ba kan ym long tang ka jingpyrta ha ri khlaw hynrei ai kan wan ka jingkylla ha ka jaidbynriew barit jong ngi.