Press "Enter" to skip to content

Khot sahkai pyngngad u CM ïa u President ha Shillong

Ai jingmut ban ïatreilang ki jylla kum shipara
Shillong: U Myntri Rangbah ka jylla, u Conrad Sangma, u la khot sngewbha ïa u President ka ri India ban pynlong ïa ka nongbah Shillong kum kawei na ki jaka shongkai pyngngad jong u.
U Conrad uba la leit ha Delhi naduh kine ki sngi baladep, ban ïakynduh ruh ïa u Myntri Rangbah duh ka ri India, u Narendra Modi ryngkat ka jingsynran lang katto katne ki Myntri jong u, u la ong ba ha India ki don artylli ki jaka sahkai pyngngad jong u President, kawei kadei ha Shimla bad kawei pat ha Hyderabad, kaba pyni ïa jingthmu ban pynïatylli lyngba ka jaka sah pyngngad u President, namar kawei ka don ha ka bynta ba shatei jong ka jong ka ri India, kawei pat ka don ha ka bynta ba shathie. “Nga ai jingmut ban don ruh sa kawei ka jaka sah u President ha ka thaiñ shatei lammihngi, khamtam ha Shillong, kaba long ka nongbah kaba pawnam”, la ong u Myntri Rangbah, da kaba bynrap ba u President u lah ban sah hangne artaïew ha ka shi snem bad kan long ruh ka khubor kaba bha na ka bynta ka jingïalong shi tylli ka ri India.
Ha kane ka jingïakynduh bad u Modi, u Conrad u la ai jingmut ruh ban ka jingïatreilang hapdeng ki artylli ki jylla ha ka rukom ka jingïalong shipara. U Conrad u la ong ba ka kum ka Meghalaya bad ka Maharashtra ha kaba lah ban don ka jingïatreilang ha ka liang ka jingshna phlim, ki jingrwai bad kiwei kiwei kynthup ïa ka jingpynmih ïa ki jhur ki jhep bad ki soh ki pai.
Kawei pat ka bynta kaba u Myntri Rangbah u la pynpaw hakhmat u Myntri Rangbah duh ka ri ka long ha ka liang ka khaïi ka pateng, khamtam bad ka ri Bangladesh, ha kaba ki kad khaïi na kane ka thaiñ ki kham jan sha katei ka ri bad ïa ki kad khhaïi sha Kolkata. “Na Guwahati sha Kolkata ka jingjngai ka long kumba 1000 Km, hynrei sha Chittagong, Bangladesh pat ka long tang kumba 600 Km”, la ong u Conrad. U la tyrwa ruh phra tylli ki surok na Guwahati sha Bangladesh kiba lah ban long kum ki lynti ban pyndonkam ha ka khaïi ka pateng.
Shuh shuh, u Myntri Rangbah u la ban ruh ïa ka jingdonkam ban don ka jingïajan ne ka jingïatreilang kaba khamjan hapdeng ki jylla bad ka Niti Aayog. Nangta shuh shuh u la ban ruh ïa ka jingdonkam ban pynrung noh ïa ka ktien Khasi bad ktien Garo ha ka khyrnit kaba phra jong ka riti synshar ka ri India, ka jingpdiang ka Meghalaya ïa ka National Games ha u 2022 bad kumjuh ruh ka jingpynkhreh ka sorkar jylla ban wanrah noh da ka Water Policy ha ka jylla.