Press "Enter" to skip to content

Leit jngoh ka kynhun ki Engineer MeECL ïa ka Skul ki Khynnah baduk

Kynshi: Ka kynhun ki Engineer bad ki nongtrei ka MeECL, ha ka sngi Saitjaiñ, hapoh ka kynhun MeECL Friends United (MFU), ka la leit jngoh ïa ka Kynshi Mawria LP School, Kynshi, kaba long ka skul ba ka Shnong ka la seng ha u snem 2013 kum ka jingïaleh ban ailad ïa ki khynnah kiba wan na ki longïing longsem baduk ban leit pule ha katei ka skul step, da kaba ailad ba kin leit skul khlem donkam jingsiew eiei.
Kane ka skul ka la don la ka jong ka jaka bad ka ïing kaba la tei da ka pisa jong ka shnong ryngkat ka jingïarap pisa 50 hajar tyngka da u MLA ka Mawthadraishan u Bah HB Nongsiej ha ka por ba sdang ïa ka. Ki khynnah ba leit pule hangne kidei kiba mynsngi ki hap ban ri ban sumar ïa ki para haba ki kmie ki kpa ki leit bylla bad don ruh kiba ïarap lem ha ïing hasem da kaba lei tap blang ap masi ynda la wai skul. Ka skul ka don lai ngut ki nonghikai kiba la pass BA bad arngut na ki, ki la pyndep ïa ka D.El.Ed.
Kane ka kynhun ka la ïakynduh ïa ki khynnah skul bad kumjuh ruh ïa ki nonghikai ha ryngkat ka jingïadonlang u Sordar ka Shnong, ki Dkhot ka Executive Committee ka Shnong, ki Dkhot ka Seng Kynthei jong ka Shnong, ki kmie ki kpa jong ki khynnah bad kumjuh ruh ki paidbah nongshongshnong. Na ka liang kane ka kynhun hapoh ka kynhun ïalehkai phutbol MeECL Friends United ka la noh synñiang 50 hajar tyngka sha ka Skul.
Kane ka kynhun kaba la wan kum shi bynta ban ïalehkai phutbol paralok bad ki rangbah bad samla ka Shnong Kynshi Mawria, ki la pynlong ruh ka jingthung dieng ha phyllaw jong kane ka skul bad kumjuh ruh ha ki jaka ba marjan jong ka skul.
Ha phylaw jong ka skul, la pynlong ïa ka jingïalang kaba la lyngkot ha kaba la pynïaid ïa ka jingïalang da u Sordar jong ka Shnong, Bah P. Sohkhlet bad la ïoh ruh ïa ka jingpynshai halor ka rukom pyndonkam ïa ka bording elektrik da u Executive Engineer, Bah RM Mawlieh. U Bah Mawlieh u la ïathuh ba ka jingpyndonkam da ki LED Bulb kan ïarap shibun ïa ki paidbah ban pynduna ïa ka jinglut ka bording elektrik bad kumjuh ruh kan pynduna ïa ka jingheh ka bill lait. U la ïathuh ruh ba ka jingpom pathar ïa ki dieng ka la wanrah ka jingduna slap bad namar ka jingduna slap ki wah ba tan bording elektrik ruh ki shah ktah bad kumta ka wanrah ïa ka jingduna ha ka bording elektrik. Ka MFU ka la ai sngewbha ruh sha ka Shnong 50 tylli ki LED Bulb.
U Bah Paia B. Synrem, Manager ka MFU, haba kren pat shuwa ban sdang ka jingïalehkai phutbol, u la ong ba ka MFU ka dap da ka jingsngewkmen haba ka ïoh ïa kane ka lad ban wan jngoh ïa kane ka skul, kaba ki khynnah kidei kiba wan na ki longïing longsem baduk. “Ngi sngewkmen ba ngi lah ban leh eiei ne ban ïanoh synñiang lang ïa kane ka jingthmu babha jong ka Shnong Kynshi Mawria”, la ong u Bah Paia.
Ha kajuh ka por na ka liang ka MFU ka la ai sngewbha ruh lai tylli ki ball na ka bynta ki khynnah jong kane ka skul.
U MDC ka Parïong- Mawthadraishan, Bah Jambor War, uba la pynbuh ruh ka skhim ba 1.50 lak tyngka na ka bynta kane ka skul, haba kren shuwa ban sdang ka jingïalehkai phutbol, u la pynpaw ka jingsngewkmen ba na kane ka shnong ki don ki nonghikai kiba la lenlade ban hikai ha kane ka skul, wat hapdeng i jingsiew iba rit ruh. “Ka mynsiem lenlade jong phi kan kyntiew ïa ki hep kiba rit kiba leit ban pule ha kane ka skul”, la ong u EM ka KHADC.