Press "Enter" to skip to content

Pan pisa u Bah Hek na ka Sorkar NDA ban thied tiar ha ki MCH Hospital ha Jylla

Shillong, Jylliew 17: U Myntri ka koit ka khiah ka Jylla Bah A.L.Hek ula pan jingiarap da ka song pisa na ka Sorkar National Demo cratic Alliance (NDA) ban thied ïa ki tiar ka juk ba mynta na ka bynta ki artylli ki Mother & Child Health (MCH) Hospital bad ban tei ïa ka Training Institute ha Nongbah Shillong.
Ha ka dorkhas bala aiti sha u Myntri ka Ministry of Health & Family Welfare Dr Harsh Vardhan ha New Delhi ba un tuklar lang, u Bah Hek ula ong “Nga pan ïa ka jingiarap song pisa na ka bynta ban pynbiang ïa ki tiar ki tar jong ki jaka sumar hapoh ka Jylla Meghalaya”.
Kat kum ka dorkhas, u Bah Hek ula ongba ka Jylla ka donkam T. 10 klur bad T. 6 klur
ban thied ïa ki tiar na ka bynta ka MCH Hospital ba 100 jingthiah ha Jowai, West Jaiñtia Hills bad ka MCh Hospital ba 50 jingthiah ha Nongstoiñ, West Khasi Hills. U ong ruh ba ka Jylla ka donkam ïa ka jingiarap jong ka Ministry haduh T. 80 lak ban lah pyntreikam pura ïa ka Blood Component Seperation Unit, Tura, West Garo Hills District.
Ka Blood Component Seperation Unit ka dei kaba la pynïasoh bad tang kawei ka Blooc Bank jong ka Ri-lum Garo kaba ai ka jingshakri ïa ki nongshongshnong jong baroh san tylli ki District ka thaiñ.
U Bah Hek u ong ba hapoh ka Forward Linkages Scheme, ka Jylla ka tyrwa ban tei ïa ka Training Institute jong ka juk ba mynta ha Nongbah Shillong, kaban don lut ïa ki jingdonkam baroh na ka bynta ban ai jinghikai ïa ki Doktor bad ki Nongtrei jong ka Tnad ka koit ka khiah ka Jylla.
“Ngi donkam ïa ka song pisa ba kot T. 15 klur ban tei ïa ka Training Institute haba phaikhmat sha ka jingdonkam ba kyrkieh ban nang pyniar ïa ka jingnang jingtip bad ka jingtbit ban ai jingshakri jong ki Doktor ne ki Nos” ong u Bah Hek uba la pan ruh ïa ka song pisa ba T. 6 klur ban thied shuh shuh ïa kumba 50 tylli ki kali Ambulance hapoh ka Jylla.
U Myntri u ong ba ka Jylla ka don haduh 39 tylli ki Health Blocks kiba don haduh 444 tylli ki Sub Centre, 109 tylli ki PHC bad 28 tylli ki CHC bad namar kane ka donkam bha ïa ki Ambulance ban lah pynbiang ïa ka jingshakri. U ong ba ïa mynta ka Jylla ka don tang 48 tylli ki Ambulance ha baroh 11 tylli ki District ka Jylla.
Ha kajuh ka por, u Myntri ula ong ruh ba kum shibynta ban pynjanai shuh shuh ïa ka RMNCH+Health Status jong ka Jylla, ka Jylla ka donkam ban pyntreikam ïa shibun ki jingtuklar bad ki jingkynshew pisa ha ka liang ban pynjanai ïa ka jingshakri jong ka RMNCH+A ha ka rukom jong ka Mission.