Press "Enter" to skip to content

Pyrshah ka Congress ban ai pata ïa ki Harijan ha Them Metor kat kum ka LT Act

Shillong, Jylliew 17: Ka Indian National Congress (INC) kala pyrshah jur ïa ka jingdawa jong ka Harijan Panchayat Committee (HPC) na ka Sorkar Meghalaya Democratic Alliance (MDA) ban ai pata noh sha ki Harijan ba kin long trai ïa ka Them Metor, Iew Mawlong.
Kane ka jingpyrshah kala mih halor ka jingdawa jong ka HPC na u Myntri Rangbah ka Jylla Conrad Kongkal Sangma, ba ong ba ka Sorkar Jylla ka dei ban pynthikna ba kan ai noh da ka pata ba shirta sha ki Harijan ba kin long trai ïa ka jaka ba heh kumba 2 acrea ha Them Metor khnang ba ki Harijan kin ïoh ban shna noh ïa ki Ïing ki sem kiba paka.
Kat kum ka shithi bala phah da ka HPC sha u Myntri Rangbah ka Jylla “Ka Sorkar Meghalaya ka dei ban pynthikna ba ngi (Harijan)
dei ban ïoh ïa ki kot pata ba shirta ban long trai ïa ka khyndew namar ngi don ïa ki kot pata bala ai pateng sha ki Kpaieid jong ngi da u Khlieh Nongsynshar jong ka jaka”
Halor kane, ka Congress kala pyrshah ïa kane ka jingdawa bad ong ba ka Sorkar Jylla ka dei ban nym ïaid kiar ïa ka Meghalaya Land Transfer Act 1972 ba khang ban die ne ai jaka sha ki Bar Jylla.
“Ka jingdawa jong ka HPC kam shong nia satia. Ka Sorkar kam dei ban ïaid lait ïa ka Land Transfer Act 1972” ong u Chief Whip ka Congress ba don ha Liang Pyrshah Bah Process T Sawkmie uba dei ruh u MLA ka Mawlai Constituency.
Haba pynpaw ba ïa ka hok ban shong ban sah ha Them Metor yn nym lah ban ïapeiñ, u Gurjit Singh Secretary ka HPC uba dei ruh u President jong ka City Gurdwara Management Committee, Shillong ula ong “Kano kano ka jingpyrshang jong ka Sorkar Jylla ban pynkynriah lane kyndang ïa ngi ka dei ka jingpynkheiñ ïa ka Riti Synshar ka Ri (Constitution) bad ïa ka hok jong ngi halor ka nongkynti ba 2 acrea ka jaka bala ai ha ngi da u Syiem ka Hima Mylliem shuwa u snem 1863 uba la pynthikna ruh da ka Declaration ha u snem 2008”.
Halor kane, une u MLA ka Congress ula kyntu ïa u Syiem ka Hima Mylliem ba un pynduh pyndam noh ïa baroh ki kot pata bad ki kot ki sla ba ka Hima kala aiti sha ki Harijan ha u snem 1863. Kat kum ka jingong jong u, ka jingai jaka jong u Syiem Mylliem ha katei ka por ka long tang ba kin ïoh sah shipor.
Haba pyntip ba ka Sorkar kala dep ban pynshna ïa ki Quarter kiba biang na ka bynta ki Harijan ba trei ha SMB, une u Heh ka Congress ula ong “Ki Harijan ba trei ha SMB bad kiwei ki tnad Sorkar ki dei ban leit sah noh ha ki Quarter bala pynshna ïa ki khnang ba ka Hima bad ka Sorkar kin lah ban pyndonkam ïa ka jaka ha Them Metor”.
U Bah Process ula iaroh ruh ïa ka nongrim ba ka Sorkar Jylla ka ieng bad ong “Ka dei ka jingshisha ba ka Them Metor ka dei ka slum bah jong ka Nongbah Shillong bad ka bym ikhiah krat-ikhuid i suba ban shong ban sah ki briew”.U ong ba ka Sorkar Jylla ka dei ban ïaid kat kum ka Riti Synshar ka Ri ha kaban pynkynriah ïa kine ki briew sha ki jaka ba bit ba biang.