Press "Enter" to skip to content

Sdang ki Pulit Ri Bhoi ba pynsngethuh paidbah halor ka jingma u Drok ha Umden

Nongpoh, Jylliew 17: Kumba u droks bad ki kam sniew ba bun jait ki la sdang ban kynrei ha kylleng ki jaka ka dong Ri-Bhoi, ka tnad pulit ka Ri-Bhoi kala angnud ban rat diengkhong bad pynduhjait ïaki kam sniew da kaba sdang pynlong da ki program ai jinghikai paidbah ban pynsngewthuh bad ban wanrah ka jingïajan hapdeng ki pulit bad ki paidbah naka bynta ban rat diengkhong ïaki kam sniew.
Ka tnad pulit lyngba ka ophis u Superintendent of Police, Ri-Bhoi District kala sdang ban pynlong da ka jinghikai paidbah haka shnong Umden ha Ri-Bhoi halor shibun ki kam sniew kum u droks, ki kam thok kam shukor, ka aiñ ba ïadei bad ki khynnah, ki kam tuh kam lute bad kiwei kiwei kiba ktah ïaka shongsuk shongsain haka imlang ka sahlang bad ïakitei baroh lah ban the lakam bad rat diengkhong tang lada ki paidbah ki ai ka jingïatreilang bad ka tnad pulit bala ai ruh ka jingpynshai kaba bniah sha ki paidbah da u Bah PS Marweiñ O/C ka Nongpoh Police Station.
Ha katei ka sngi la don ryngkat ruh da u Bah VDS Rymbai DSP Headquarter, Bah W Shylla Longsan ka Raid Nongtluh, ki Sub-inpsector ba kynthup ïa u Bah PK Lyngdoh, Alphius Sangma, Alfas Nongkhlaw bad kiwei kiwei ki ophisar pulit ka Ri-Bhoi.
Haba ai jingpynshai ha katei ka sngi sha ki paidbah ka thaiñ Umden bala pynlong ruh ha iew Umden u Bah PS Marweiñ u la ban jur halor ka jingdonkam ban ratdiengkhong ïaki kam sniew kiba la nang kynrei katba nangmih ki sngi nakadaw ka jingmih ki droks bad ki jingdih buaid ba bun jait ha kaba kum ki tnad pulit ki donkam ka jingïarap bad ka jingtreilang bad ki paidbah naka bynta ban tehlakam ïaki kam sniew da kaba ai jingmut ruh ïaki samla bad ki rangbah kynthei bad shynrang kiba la dap 18 snem shaneng ba kin thaw noh da ka Village Defence Party ban peit pyrman bad tehlakam ïaki kam sniew ha shnong ha thaw.
U la pynshai ruh shibun ki bynta ha kaba ïadei bad ka aiñ ban ïada ïaki khynnah kum ka POCSO Act, Justice Juvinile Act ba kum ki paidbah ki dei ban tip bad sngewthuh ha kaba ïadei bad ka hok ki khynnah bad ban ïada na kino kino ki kam pyrshah bad thombor ïaki.
Shuh shuh u Bah Marweiñ ha katei ka sngi u la ban jur ïaki paidbah halor u droks bad ki kam sniew kiba la nang kynrei man la ka sngi ba kum ki kmie ki kpa kidei ban peit pyrman ïala ki jong ki khun ki kti bad sha ki paidbah ba kim dei ban kem hi bad ktah kti ïaki nongdie lane nongdih droks hynrei ba kin pyntip sha ki police Station ba hajan eh ba kin leh ïa kaba donkam.
Nalor kitei ki kam sniew u bah Marweiñ u la pynshai ruh halor shibun ba ki paidbah kin gat haki kam thok kam shukor kum ki Social Media, ka jingshah thok bad shah sei pisa tuh haki ATM, ka jingshah tuh ki Mobile ha kaba kum ki paidbah ki dei ban husiar bad ban long kiba stad ym ban ngat kulmar ha kino kino ki briew kiba pynbiej khamtam haki jaka nongkyndong, ha kaba ki paidbah kiba la wan ban sngap ha katei ka sngi kila ioh jingmyntoi shibun.
Namarkata naka liang ka tnad pulit ka Ri-Bhoi kala pan ka jingkyrshan bad ka jingïatreilang bad ki paidbah khnang ba ki kam sniew kin ioh ban suhthied haki shnong ki thaw bad lada ki paidbah ki don kano kano ka jingsuba ki lah ban pyntip beit sha ki bor pulit ba kin leh ïa kaba donkam u la bynrap.
Shuh shuh kane kadei ka jingsdang jong ka tnad pulit ban ïalap paidbah naka shnong Umden bad sha kiwei kiwei ki jaka halor ka jingsniew bala kynrei katba nangmih ki sngi bad angnud ruh ban rat diengkhong ïaki bad kine baroh lah ban pynurlong tang lada ki paidbah kin treilang bad ki bor pulit.