Press "Enter" to skip to content

Shah hiar thma ki Dkhot ka KJBWA ha ki Nongkhaii masi sha Bangla, mynsaw jur 3 ngut

Shillong, Jylliew 17: Ki Dkhot jong ka Khasi Jaiñtia Butcher Welfare Association (KJBWA) ki la shah hiar thma hynnin ka miet sngi U Blei ha ka kynhun ki Nongkhaii tuh ïa ki masi katba ki dang ïaid peitngor ïa ki kali ba kit masi ban pynrygnkar par sha Bangladesh.
Kane ka jingjia kala jia ha ka por 10 baje eiei ha Mawleiñ Mawkhan (Lalsharai) Ri-Bhoi District bad haduh 3 ngut ki dkhot ka KJBWA kila mynsaw jur. Ki Pulit ka Umiam Police Station kila ïoh ruh ban kurup ïa kawei ka wait, kaba la suba jur ba dei jong ka kynhun ki Nongkhaii tuh ïa ki Masi ba la pyndonkam ban thombor ïa ki dkhot ka KJBWA.
Kitei ki lai ngut kiba la mynsaw ki kynthup ïa u Khrawkupar Kharnaior, Pynshisha Buhphang bad u Bah Kupar Lyngkhoi.
Kat kum ka jingïathuh jong u President ka KJBWA Bah Generous Warlarpih, ki briew ba thombor ïa ki Dkhot jong ka KJBWA kila wan ha Mawleiñ Mawkhan da kawei ka kali Verna rong iong bym pat don Registration Number. U ong, kine ki briew kila wan thombor hadien ba ki dkhot ka Seng kila leit kylli pyrthew ïa kawei ka trok kit masi ba pynieng harud surok jong kane ka Shnong.
U Bah Generous u ïathuh ba ka rukom wan jong kine ki briew ruh ka long kaba ishyrkhei bha bad mar ïapoi hajan ba ieng ki Dkhot, kumba saw ne san ngut ki briew kila hiar na ka kali (Verna) bad hylla ban shu bom pathar ïa ki dkhot ka seng. Kine ki briew kila pynjulor ruh ïa ka kali ba shong ki dkhot ka Seng.
“Kaba lyngngoh ka long ba mar syn sawa ka sur ‘bom bom’, da ki phew ngut ki briew kila mih bad kila shu thombor beit ïa ki dkhot jong ngi. Hapdeng ka jingialeh, 3 ngut ki dkhot jong ngi kila mynsaw jur bad uwei ula laitphet bad jah rngai haduh ka step kaba bud” ong u Bah Generous haba pyntip ba ïa kine ki 3 ngut ba mynsaw la pynkit noh mar mar sha Hospital da ki dkhot ka seng kiba shu mynsaw malu mala.
Une u Nongïalam ka seng ki Nongotdoh u ong ba ki Dkhot ka Seng kila leit tur sha ka trok ba kit masi tang ban kylli na u nong niah ba shano yn kit ïa ki masi bad mano ba dei trai jong ki masi. U ong ba kane ka jingleit kylli ka long ruh ban tip ne lap ba ïoh don napdeng ki Dkhot ka Seng kiba dang bteng ban leit thied masi na Iew Khanapara wat haba ka seng kala rai ban sangeh leit thied masi bad ban khang die doh masi ha Ri-lum Khasi bad Jaiñtia.
“Kawei ruh ka long halor ka jingkren u Symbud Myntri Rangbah ka Jylla ba ong ba lada don kano kano ka jingisuba ïa ki kali ba kit masi sha Bangladesh, wat ki riew paidbah ki lah ban kem bad aiti sha ki Pulit” ula ong.
U Bah Generous u ong, kum ki nongïalam haba ïoh jingtip ïa kane ka jingshah thombor, kila hiar mar mar sha Mawleiñ Mawkhan ban iarap ïala ki jong ki Dkhot hynrei ynda poi ha katei ka jaka, ym shym don ba nud ban hiar na kali namar ka jingsyrtap ki briew jong ki nongkhaii tuh ïa ki masi. U ong, namar kane, na ka liang ki nongïalam kila leit pyntip noh sha ki Pulit ka Umiam Police Station ba kin iarap lem ïa ki Dkhot ka Seng ba shah thombor.
“Ynda ngi la hiar lang bad ki Pulit, ngi shem ba ki Dkhot jong ngi kila sakma lut bad ka huri hura ruh kam don shuh ha kane ka jaka. Kaba ngi lap ka long tang kawei ka wait bad ïa kane ka tiar la kurup noh da ki Pulit kum shibynta jong ka jingtohkit” ula ong.
Haba ïadei bad ki Dkhot uba jah rngai, u Bah Generous u pyntip ba ki dkhot ka Seng ryngkat ki Pulit ka Umiam Police Station kila pyrshang ban iawad ïa une u dkhot baroh shimiet hynrei ym shym la lap satia. U ong ba dei ha ka por step phyrngap, une u dkhot uba la shu phet ruma sha Ïing briew, ula wan mih hi dalade ryngkat ka jingkylla dur ba lait na ka ïap hadien ba u ïohsngew ïa ka sur jong ki Nongïalam.
U Bah Generous u pyntip ba na ka liang ka seng KJBWA kala leit buh da ka ejahar ha ki Pulit ka Umiam Police Station halor kane ka jingjia bad kala kyrpad ruh ïa ki bor ba dei khmih ba kin tohkit kham kloi ïa kane ka kam bad ban pynshitom da kaba tyngeh ïa ki briew kiba donkti ban thombor.
“Kiba bun ki Dkhot jong ngi kila bitar ïa ka jingleh riewkhlaw jong kine ki briew kaba la poi shaduh u pud ban iajaw snam. Kila byrngem ban nym shu ieh ïa kane bad ban pynkhreh ha kaban ialeh pyrshah ïa ka kam riewkhlaw jong ki nongkhaii tuh ïa ki masi” ong u Bah Generous haba pyntip ba kum u Nongïalam ula kyntu ban long jai jai hynrei bun kim pynsngap shuh bala jur palat ka jingbitar.