Press "Enter" to skip to content

Sngew pyrshah ka KHNAM ba wan tuklar kiba nabar halor ka Them Metor

Shillong, Jylliew 17 : Ka Khun Hynniewtrep National Awakening Movement (KHNAM) ka pypaw ka jingsngew pyrshah jur halor ka jingwan tuklar ba khlem nongrim bad khlem da tip bniah ïa ka sdang ka kut jong ki bor kiba na bar halor ka kam Them Metor ha Them ïewmawlong bad na ka liang katei ka party ka la pynpaw ba kan nym lah ban pdiang ïa kane namar kane ka lah ban pynbitar bad ïalam bakla ïa kiba bun ba lang bad ka lah ban pynsngewthuh bakla ïa ka sorkar pdeng bad ïa ka minority Commission ruh.
Ha ka jingpyllait khubor na u President ka KHNAM u bah Pyndapborthiaw Saibon u la ong “ Ngi long ka jaitbynriew kaba don ka jingngeit ha ka jingïaburom iwei ïa iwei bad ha ka jingïaishah. Ka jaka them ïewmawlong ka la long ka jaka kaba jaboh bha (Slum) kaba la long ka jingma ym tang ïa ki nongïaid nongwan, hynrei wat ïa ki Harijan ki ba sah ha kito ki jaka. Ka jingthmu kam dei ban beh
ïa kine ki Harijan na kane ka jaka hynrei ban pynkynriah ïa ki sha kawei pat ka jaka kaba kham khuid kaba biang ka um bam um dih bad kiwei kiwei, hynrei ka jingpyneh jong ki ban leit sha kawei pat ka jaka ka pynpaw ba kadon eiei sha lyndet bad lehse kine ki la kwah ban kam trai junom syndon ïa ka khyndew kaba long pyrshah ïa ka jingthmu jong ka 6th scheduled ka Ri India bad ka land transfer act jong ka jylla”.
La ong shuh shuh ba ka seng UDP kumba la ïohi lyngba ki lad pathai khubor ka la pynskhem ba dei ban pynkynriah beit ïa ki na katei ka jaka bad kane ka long ka jingai mynsiem namar la tip ba ka UDP kadei ka seng kaba ïadon bad kaba kyrshan bha ïa kane ka sorkar kaba mynta. Kumta lada ka UDP ka mon shisha ka lah ban pynurlong ïa kane ka jingthmu. Ka Sorkar Punjab, ka NHRC, ka Minority Commission bad ka sorkar pdeng baroh kidei ban ïohi ba katei ka jaka kam ïahap shuh ha ka kyrdan kaba biang naka bynta ban sah ki briew, bad ka jingpynkynriah ïa ki kan wahrah ka jingkoit jingkhiah ïa ki bad ka jingkylluid ïa baroh. Ka Hima ka Council bad ka Municipal ki la bakla naduh mynshwa haduh ba poi u pud mynta ba kine ki jaitbynriew ki la sngew khun khatduh ïa lade haduh ba ki nud ban dawa da ka pata kaba pura na ka sorkar jylla. Ka seng ka khmih lynti ba ka sorkar shen kan lah ban weng noh ïa ki na katei ka jaka na ka bynta ka bha ka miat jong ka jylla hi baroh kawei.