Press "Enter" to skip to content

T. 65 klur tyngka donkam ki 20 tylli ki synjuk ïalehkai ka jylla ban pynkhreh ïa ki nong ïalehkai NG 2022

Shillong, Jylliew 17: Arphew tylli ki synjuk ïalehkai kiba tikna jong ka jylla kiba la ithuh ïa ka da ka Meghalaya State Olympic Association (MSOA) ki donkam ïa ka song pisa bym duna ïa ka T. 65 klur,naka bynta ban pynkhreh ïa la ka kynhun ïalehkai ban mih khmat ïa ka jylla ha ka por ba kan pynlong ïa ka National Games ha u snem 2022.
Ïa kane la ïathuh da u Working President ka MSOA u bah John F. Kharshiing haba ïakren bad ki nongthoh khubor hynne ka lah sngi U Blei.
“Kane ka pisa kaba ki 20 tylli ki synjuk ïalehkai ki donkam, ka wan lyngba ka jingïashong pyrkhat kaba la kham bun sien lyngba ka ‘team preparation committee’ bad ka tnat Sports ka sorkar jylla bad ïa kane ka mang pisa kaba ki synjuk ïalehkai ki donkam, ka dei kaba la dep ban aiti pat ïa ka naduh u snem ba la dep sha ka sorkar” la ïathuh u bah John.
Haba ïadei bad kiwei pat ki synjuk, ïalehkai kiba sah sa kumba 16 tylli, u bah John u ïathuh ba kine ki dang hap ba kin pynbiang shwa ïa la ki jingdonkam ka jong ki, khamtam lei lei ba kin da ioh ïa ka jingithuh pura ïa ki da ki synjuk ïalehkai ba don ha kane ka ri.
Haba kylli la ka MSOA ka don ne em ïa ki lad ki lynti ba nalade ruh kan pyrshang ban ioh ïa ki lad ïarap pisa lyngbaki kompeni kiba don ha kane ka jylla ne na shabar, u bah John u ïathuh ba ka MSOA ka la dep ba kan shong bad ïa kynduh bad ki briew jong ki kompeni khamtam lei lei kiba don ha kane ka jylla, ha kaba don ruh ki kompeni kiba la wan shakhmat ban ïarap noh ïa u synñiang u jong ki sha ki synjuk ïalehkai kiba don ha kane ka jylla.
Kumta kaei kaba donkam hi ka long, ba ka MSOA kan hap ba kan phai beit ki khmat sha ka sorkar jylla ba kan shim lem ha ka ïa ka jingkit khlieh ban sdang ban bhah ïa kane ka mang pisa, kaba ha ka shi snem, kine ki 20 tylli ki synjuk ïalehkai kin donkam ym duna ïa ka T.16 klur tyngka.
Naka liang ki nongïalam ki synjuk ïalehkai ki pynpaw ba lada ka sorkar jylla kam lah ba kan buria lem ïa kane ka pisa kaba donkam, ka jing-thmu ban pynlong ïa ka NG 2022 kan long lehnohei, ha kaba ka jylla kan nym lah ban sei madan ïa la ki khun samla ban ïakhun ha kane ka lympung bah ïalehkai ban long ha ka jylla.