Press "Enter" to skip to content

Yn rakhe ka MSOA ïa ka Olympic Day, mynta ka sngi ka ïakob jingkyntip ki kolej

Shillong, Jylliew, 17: Ka Meghalaya State Olympic Association (MSOA) kan ïa snoh kti lang ha ka jingrakhe ïa ka Olympic Day, da kaba kan pynlong mynta ka sngi Hatmajai jong ka taiew da ka ïakob jingkyntip (inter college sports quiz com-petition) kaban long ha Soso Tham Auditorium, naduh ka por 10 baje mynstep.
Hadien kane ka jingïakob, ka MSOA kan pynlong pat ïa ka ïakob mareh ba tip ïa ka kum ka Shillong 10 K Run, kaban long ha ka step jong ka 22 tarik mynta u bnai kaban sdang na Soso Tham Audi-torium ha ka por 7 baje mynstep.
U kongsan ban wan khaweh ïa ka lama jong kane ka jingïakob mareh un dei u myntri ba dei khmih ïa ka tnat sports ka sorkar jylla u bah Banteidor Lyngdoh.
Kumba ka long mynta, ha kne ka jingïakob kaba mynta, ka MSAOA ka sngewkmen ïa ka jingkhreh ïashim bynta jong ki paidbah bad kiba la dep ban ai ïa ki kyrteng ki la kynjoh palat ïa ka arspah ngut.
“Ka jingkhang ban ïa shim bynta sha kane ka ïakob ïa mareh kan dang ïai plie tad haduh ka 20 tarik, katba ka jingsam ïa ki sopti (t-shirt) bad number (chest number) yn sdang ban sam ïa ki naduh ka 19 tarik naduh ka por 3 baje nohphai sngi ha ophis trei kam ka MSOA” ïathuh u bah John F. Kharshiing, Working Presi-dent ka MSOA haba ïakren bad ki lad pathai khubor hynne ka lah sngi U Blei.
“Kane ka dei ka snem kaba ar ba ngin pynlong ïa kane ka jingïakob kaba ngi na ka liang ka MSOA, ngi kwah ba ngin da ioh ïa ka jingithuh kaba pura na ka synjuk jong ka Athletic Federation of India, khnang ba ngin lah shuh shuh ba ngin khring ïa ki nongïashim bynta kiba nabar jong ka jylla” la bynrap shuh shuh bah John.
Nalor katta ka MSOA kan pynlong ruh sa ïa kawei ka jingiakob kaba kyrpang ïa ki khynnah ba dang rit ka ‘Walk & Run For Fun’, ha kaba ki nongïashim bynta kim don kam ban siew eiei lait tang ka jingai ïa ki kyrteng ka jong ki ha ki bor ba dei khmih ka MSOA.