Press "Enter" to skip to content

Ba ai NoC ka Hima Nongspung sha ka Assam, dawa tuklar ki saw seng ïa ka Sorkar Jylla

Shillong, Jylliew, 19: Ki saw tylli ki sengbhalang kiba treikam hapoh u pud u sam jong ka Hima Nongspung kiba kynthup ïa ka Hynñiewtrep A`chik National Movement (HANM), ka Hynñiewtrep Youths Council (HYC) bad ka Khasi Students Union (KSU) bad ka Hill Farmer’s Union (HFU) ki la dawa ïa ka Sorkar Meghalaya Democratic Alliance (MDA) ba kan tuklar hi noh da lade halor ka jingai No Objection Certificate (NoC) jong ka Hima Nongspung sha ka Sorkar Assam ban shna ïa ka surok PMGSY ha ka shnong Balakhawa, Ribhoi District.
“Ka jingshah thombor jong u Secretary ka Hima Nongspung, u Bah Michael Warjri ka la mih na ka jingai NoC ïa ka Sorkar Assam ban shna ïa ka surok PMGSY ha ki san tylli ki shnong kiba hap hapoh ka Hima Nongspung,” ong kine ki saw seng ha u
kyrwoh ba la phah mynta ka sngi.
“Ha ka jingshisha ïa ka NoC ladep ban ïasoi naduh u snem 2016 da ka Ophis jong ka Hima Nongspung bad ka Sorkar Assam, hynrei mynta pat ka mih ka jingïatei pop uwei ïa uwei para ma ki, ki nongïalam jong ka Hima. Kane ka paw shai ba ka dei tang ka buit thaw phoidari ban da rapjot ïa la ki jong ki jingleh, lada ym dei ka jingïasngewthuh jingmut lang para ma ki naduh u snem 2016 balei pat ka mih lane ka paw pyrthei mynta hadien ba la mih katei ka jingjia ha Balakhawa,” la kynthoh ki saw seng ha u kyrwoh.
Haba takraiñ tyngeh ïa ki khlieh nongsynshar ka Hima, kine ki saw seng ki la ong, “mynta ngi ïohi ba ka la mih sa ka jingïakynnoh bad ïa aidaw uwei halor uwei pat para ma ki. Khnang ba kan lait na ka jingïa aidaw, ka Sorkar Jylla ka dei hok ban tuklar noh mardor ïa ka KHADC ban pynsangeh noh mardor ïa ka jingtreikam jong u Syiem ka Hima Nongspung, u Pa’iem Patrick Syiemiong bad ïa ka Ophis jong u.”
Ki saw seng ki la ong ruh ba dei ban thung bujli shwa da uwei u Acting Syiem bad ban pyndam noh shi syndon ïa ka NoC ba la dep ai sha ka Sorkar Assam.
Shuh shuh ki la kynthoh ruh ba lada ka Khasi Hills Autonomous District Council (KHADC) kan dang ailad ïa kine ki jait nongsynshar kam don jingmut satia ïa ka Sorkar Jylla ban ïakren pynbeit bad ka Sorkar Assam bad ban ïakren ïa ka Inner Line Permit.
“Lada ka KHADC ka shimkhia ban weng noh ïa une u Syiem (Patrict Syiemiong) ngi ngeit ba kan long kum ka jingsneng ne ka jinghikai wat ïa kiwei pat ki ki Hima khappud kiba don hapoh ka Jylla,” ong u kyrwoh.
“Ngim lah ban sngewthuh haduh katno ka bor jong une u Syiem bad ïa ka ophis jong u kat haduh ban da ïasoi ïa ka Agreement bad ka Assam. Ka KHADC ka ladei ban kyntait mardor ïa ka jingïateipop para ma ki (nongsynshar hima) hynrei ban weng shisyndon ïa une u Syiem na ka khet khlem da buh por ne khot hajir,” la ong shuh shuh u kyrwoh bad bynrap, “namar ngi sngew lyngngoh naduh ba la lap ïa ka jingai NoC ka KHADC haduh mynta kam pat ai ïa kano kano ka jubab ïa ki nongshong shnong bad ïa ki paidbah ka jylla baroh kawei.”
“Lada ka KHADC ka pynslem ban pynhiar ïa u Syiem ka Hima Nongspung na ka khet ngim banse ban leit sha ki bor kiba kham halor namar ngim kwah ban ïohi ïa ki shnong kiba hap hapoh ka Hima jong ngi kumba la jia ha Langpih bad kiwei kiwei,” la byrngem ki saw seng.