Press "Enter" to skip to content

ïakhih ki sengbhalang ha Garo ba thmu pynkynriah kam ïa ki ophisar

Shillong, Jylliew 19 : Ka jingkhang tala ki Enforcement jong ka Khasi Hills Autonomous District Council ïa ki 33 tylli ki dukan ha Nongmensong ka la pynlong ïa u Myntri ka tnad ka Koit ka Khiah, Bah AL Hek ban hiar hi dalade sha District Council ban kynduh ïa u Executive Member ka tnad Trade, Bah Paul Lyngdoh.
Haba kren bad ki lad pathai khubor hadien ka jingkynduh, u Bah Hek uba la ïalam lang ruh ïa baroh kitei ki 33 ngut ki trai dukan, u la ïathuh na ka liang u Executive Member u la kular ban ai por shi taïew ïa kitei ki trai dukan bym don ïa ki Trading Licence ba kin pynbiang ïa ki kot ki sla.
“Ka long kaba sngewsih ban ïohi ba ki bar jylla ba dei hok kiba la heh la san bad don ïing don sem hangne kim ïoh ïa ka laisen katba kiba dang shu wan thymmai pat ki ïoh,” u la ong da kaba bynrap ruh ba ka jingkhang wan khang tala beit beit khlem da pan jingpynshai shwa na ki dukan ka long kumba knieh noh ïa ka hok jong ki ban im.
U la ong ruh ba na kitei ki 33 ngut, ki don bun ki dukan kiba la shah set lut ki dohkha, jhur bad kiwei kiwei.
Shuh shuh u la ong ruh ba na ka bynta ka khïa ka shon bad ka bit ka biang jong u paidbah ka constituency um salia satia ban ïa kren bad no badno da kaba klet noh ïa ka kyrdan kaba u don. “Na bynta jongnga, u paidbah u wan nyngkong bad ka kyrdan hadien.”
Haba kren pat bad u Bah Paul, u la ïathuh ba ka jingkhang jong ka Council ïa kitei ki 33 tylli ki dukan jong ki bym dei Khasi ha Nongmensong kadei beit halor ka nongrim ba kim don satia ïa ki kot ki sla kiba biang ne ki Trading License bad kaba leh ruh katkum ki kyndon.
“Nga la ong ha ki ba ka Council kan shim ïa ka kaiphod na baroh ki 33 tylli ki dukan ba shah khang hangtei bad ruh ban bishar bniah ïa ki kot ki sla jong ki,” u la ong.
Nalorkata, u ïathuh ruh ba lada kidon ki dukan kiba biang shisha kumba ki kam, kata ruh katkum ki kyndon jongka aiñ Trading by Non-Tribal Regulation Act, 1954 na ka liang ka Council kan shong pyrkhat biang, tangba kin ym lah pat ban ïaid lait ïa kata.
U Bah Paul u la ïai ban biang ba ka jingkhang ïa kitei ki 33 tylli ki dukan kadei beit ba kim don laisen watla ki kam ba ki don mynshwa hynrei ki khlem pynthymmai shuh pat.
Haba jubab pat halor ka jingong jong u Myntri, utei u EM u la ong ba katkum ki kyndon ym donkam satia ban da pyntip ïano ïano shwa ba kin leit khang. La ong ruh ba kane ka jingkhynra kam pat kut satia hynrei kan ïai bteng nangne shakhmat.
Da kaba kyntait ban kohnguh lada don kiba pynbor ban phah plie biang ïa kitei ki dukan, u Bah Paul ula ong ruh ba da lei lei kin ym lah satia ban leh kumta. “Kane ka shuki ba nga shong kam dei kaba lah ban pynkhih da ka jingshah pynbor. Ngi don hangne ban pyndep bad trei katkum ka kyndon ba la pynkupbor khlem leh shilliang ïano ïano ruh,” u la bynrap shuh shuh.
La katta ruh, u ong pat ba kin sa bishar biang ïa kitei ki kot ki sla kiba kitei ki 33 dukan kin phah ha shwa ba kin shim ïa ka rai.