Press "Enter" to skip to content

ïakhih ki sengbhalang ha Garo ba thmu pynkynriah kam ïa ki ophisar

Shillong, Jylliew 19 : Ki Seng Bhalang bapher bapher ha ri lum Garo kata ha North Garo Hills bad East Garo Hills ki la pynlong da ki jingïakhih paidbah kum ki jingïaïaid paidbah bad rah placard kum ka dak ban pyrshah ïa ka jingthmu jongka sorkar ban pynkynriah kam ïa ki katto katne ki ophisar na kitei ki district.
Ha North Garo Hills ka jingïakhih ka long ban pyrshah ïa ka jingpynkynriah kam ïa u BDO jongka Kharkutta C &RD Block u P.R Marak bad uwei u MCS na Resubelpara u P.K Boro.
Katba ha East Garo Hills ka jingïakhih ka long ban pyrshah ïaka jingthmu ka sorkar ban pynkynriah kam ïa u Superintendent of Police (SP) jong katei ka District u RTG Momin.
Ki Seng bhalang ki dawa ba dei ban ailad ïa kine ki ophisar ban bteng ka jingshakri jongki haduh ban da kut ka por jongki ym ban shu pynkynriah noh ïa ki tang shiteng por bad kata ruh ha ka por ba ki dang trei bha ïa ka kam na ka bynta ki paidbah.
Ki seng kiba dawa ki long kum ka AHAM, GSU, FKJGP, ASW A, GSMC AGUU, ICFS bad kiwei kiwei.