Press "Enter" to skip to content

Jied ka GOI ïa ka Meghalaya kum ka ‘pilot project’ ban pynbiang umdih ha nongkyndong

Shillong, Jylliew 19 : Ka sorkar pdeng lyngba ka tnad Water Resource ka la jied ïa ka Meghalaya ban long kum ka jylla ba nyngkong eh (pilot project) ha ka thaiñ shatei lam-mihngi jong ka Ri ban pynbiang ïa ka umbam umdih sha man la ki ïing wat haduh ki nongkyndong.
Ïa kane la ïathuh da u Myntri ka tnad Public Health Engineering (PHE) ka sorkar Jylla, Bah Samlin Malngiang u la ong ba ha ka jingkynduh ïa u Myntri ka tnad Water Resources jong ka sorkar pdeng, u Gajendra Singh Shekhawat, ha ryngkat ka jingdonlang u Myntri Rangbah ka Jylla, Conrad K Sangma, nangta u Symbud Myntri Rangbah Bah Prestone Tynsong, kumjuh u Myntri ka tnad Water Resources, Bah Metbah Lyngdoh.
“U Myntri ka sorkar pdeng u la ong ba Meghalaya kan dei ka jylla kaba nyngkong eh ban pyntreikam ïa katei ka thong treikam jong ka sorkar pdeng, kata ban pynpoi ïa ka umbam umdih kaba biang haman la ki thliew ïing,” ong u Bah Samlin da kaba bynrap ba katei ka thong kadei ruh katkum ka ‘flagship programme’ jong ka sorkar National Democratic Alliance.
Shuh shuh u ong ruh ba la buh thong ba na katei ka pilot project ba ki pyntreikam ha Meghalaya bun kiwei pat ki jylla kin sa wan ban peit nuksa khnang ba kin lah ban pyntreikam kylla pat ha ki jylla jong ki.
Da kaba pynpaw ïa ka jingkmen ba ka sorkar pdeng hapoh ka jingïalam jong u Narendra Modi kum u Myntri Rangbah ki pynpaw ïa ka jingkloi ban kyrshan ïa ka tnad halor katei ka bynta, u Bah Samlin u la ong ruh ba nangne shakhmat kum ka tnad ki hap ban pynkhreh bad tyrwa da ki projek baheh ba heh kiba ïadei bad ka umbam umdih. “Ngi hap ruh ban pynkhreh da ki tyllong um kiba kham heh kiba lah ban pynbiang um katkum ka jingdonkam ha ki shnong ki thaw,” u la bynrap biang.
U la ïathuh ruh ba ka la don ka jingïakren halor ka Water Policy ha kaba u Myntri Rangbah ka Jylla un khlieh kum u Chairman jong ka.
Haba kren pat halor ki skim kiba dang sahteng, u la ïathuh ba ïa katei ka bynta ki lah ban pynsngew ha u Myntri ka sorkar pdeng ynda u la wan sha Shillong kumba u la kular ban wan tang shu kut ka Parliament.
“Ïa ki jingeh kiba ïadei bad ka tnad PHE ngin sa pynsngew ynda u la wan hi shane ban shong jingïalang ynda la kut ka Parliament. Wat ïa kiwei ki jingdonkam kiba ïadei ban kyntiew biang ïa ka dor trei ngin sa pynsngew lang ynda ula wan shane,”bynrap biang u Myntri.
Katkum ka jingïathuh jong u hi, ka jingïakren ha nongbah Delhi kadei kyllum beit na ka bynta ka ishu kaba ïadei bad ka jylla baroh kawei khlem da kren kyrpang ïa kano kano ka projek umbam.