Press "Enter" to skip to content

Mynta yn hiar ki Heh ka Health Ministry sha Garo namar ka Japanese Encephalitis

Ka jingpang JE kaba lah ban tehlakam: Dr War

Shillong, Jylliew 19: Ka Sorkar ka la phah mynta ïa ki Heh ka Ministry of Health & Family Welfare ban leit sha Ri-lum Garo ha ka ban peitthuh ïa ka jinglong jingman hapoh ka thaiñ namar ka jingpang Japanese Encephalitis kaba mih na u sniang.
U Regional Director ka Ministry u Dr Mazumdar un sa hiar mynta ka sngi na Shillong sha Ri-lum Garo bad ka kynhun ki riew shemphang ka JE (Japanese Encephalitis) Division jong ka Ministry ruh kin sa wan poi ha kine ki sngi ban wan ban peitthuh bad tehlakam ïa ka jingpur jong kane ka jingpang.
“U Regional Director ka Ministry of Health & Family Welfare bad ka kynhun ki riewshemphang ka JE (Division) jong ka Ministry, kin sa hiar sha Ri-lum Garo ban peit thuh ïa ka jinglong jingman” ong u Director Health Service (MI) Dr A War haba ïakren bad u Mawphor.
U Dr A War ula pyntip ruh ba i Deputy Director iba dei ruh i State Nodal Officer ka National Vector Borne Disease Control Programme, in sa hiar lang mynta ka sngi sha Tura ban iarap ïa ki Doktor hapoh ka thaiñ.
Kat kum ka jingong jong u, ka jingpang Japanese Encephalitis kala khie ha ki lai tylli ki District ka Ri-lum Garo- ka East Garo Hills, South West Garo Hills bad West Garo Hills. Hynrei u ïathuh ba ka jingdon jong ki briew bala wan shim dawa namar kane ka jingpang ki long 13 ngut bad kine baroh ki dei kiba wan shim dawai kum ki Outdoor Patient (OPD) ym ba thiah Hospital.
“Ïa mynta hi ngim pat lah ban pynthikna ïa ka jingdon jong ki briew ba ïoh ïa kane ka jingpang, ka lah ruh ban kham bun na kiba la wan shim dawai. Ngin sa tip thikna ïa ka jingdon ki nongpang ynda ngi la ïoh ïa ka kaiphod na ki kynhun ba leit sha Ri-lum Garo” ong u Dr A War haa bynrap “Ka kynhun kan sa pynthikna katno ngut kiba pang bad kumno ka jingsumar ka ïaid”.
U Dr A War u pyntip ba ka Tnad ka koit ka khiah kala bthah ïa ka Integrated Disease Survellance Programme (IDSP) jong baroh ki District ba kan pyntreikam pura ïa ka kynhun Rapid Response Team (RRT) ha kine ki District ban iarap ïa ki paidbah bad ban teh lakam ïa kane ka jingpang. U pyntip ba ka Tnad kala nang phah shuh shuh ïa ki kor synreit dawai (fogging machine) sha ka thaiñ.
Haba kyntu ïa ki paidbah ba kim dei ban sngew sheptieng ïa kane ka jingpang, u Dr War ula ong “Ka Sorkar kala shim ïa baroh ki sienjam ba dei ban shim bad kane ka jingpang ka dei kaba lah ban tehlakam ba kan nym pur ne saphriang”.
U Myntri ka koit ka khiah ka Jylla Bah A.L.Hek hynne ka sngi balang ula lum ïa ka jingïalang ba kyrkieh bad ki Ophisar ka Tnad ka koit ka khiah ban twad jingmut halor ka jinglong jingman hapoh Ri-lum Garo namar kane ka jingpang.
U Myntri ula bthah ïa u DHS(MI) ba un pynbiang ïa baroh ki dawai dashin bad ban shim ïa baroh ki lad ki lynti ha kaban teh lakam ïa ka jingsaphriang kane ka jingpang.
Na ka liang u Secretary ka Tnad u Pravin Bakshi ula kyntu ïa ki paidbah ba kin wan ïalam ïa kino kino ki briew ba suba don jing pang Japanese Encephalitis sha ki jaka sumar ba jan tam na ka bynta ban leh ïa ki test bad ban ïoh ai jingsumar.