Press "Enter" to skip to content

Pynkynmaw ka KSU ïa u DC ka WJH halor ka Entry & Exit Point

Shillong, Jylliew, 19: Ka Khasi Students Union, Jaiñtia Hills District Unit mynta ka sngi balang ka la ïakynduh ïa u Deputy Commissioner ka West Jaiñtia Hills District u Ma Garod LSN Dykes ban pynkynmaw ïa u halor ka Entry bad Exit Point ban tei ha shnong Saphai bad Khanduli, West Jaiñtia Hills.
Ka Seng hapoh ka jingïalam jong u General Secretary Samla Garland S Manner ha ka jingïakynduh ïa une u Khlieh nongsynshar ka District, ki la ïoh ïa ka jubab na u DC ha kaba u la ïathuh ba u ladep pynbeit ban shong jingïalang bad ka District Task Force bad kiwei ki tnat treikam ka Sorkar kiba dei peit ïa kane ka kam ha ka 3 tarik u bnai ban sa wan na ka bynta ban ïakren ïa katei ka phang.
Ha kaba ïadei bad ka jingthmu tei ïa ka Entry and Exit points ha Khanduli, na ka liang u DC u la ïathuh ba ka kam ka ladep nadong shadong hynrei kaba sah dei sa tang na ka Tourism Department.
Katba ka Saphai pat u la ong ba ïa ka Jingpynsngew Paidbah (Public Hearing ) la dep pyllong ha katei ka shnong bad na ka liang ki nongshong shnong ruh ki la pdiang bad mynjur ban tei ïa ka Entry and Exit Point, hynrei kaba sah ka long satang ka jingïapynbeit bad ki trai jaka.
“Ngi banjur ïa ka Sorkar ba ka dei ban pynstet ïa ka kam ha kaba ïadei bad ka jingtei ïa ka Entry and Exit Point khnang ba ka jingthmu tehlakam ïa ka jingwantuid ki mynder yn lah ban sdang noh mar mar,” ong u samla Garland S. Manner.
“Ka Sorkar kam dei ban pyllut kai ïa ka por, namar kat dang pynslem, katta dang jur ka jingwan tuid ki mynder sha poh ka jylla” u la bynrap
Ka Seng ka la rai ruh ban buddien biang khah khah ïa katei ka kam khamtam hadien ba ladep ka jingïalang kaba la thmu ban pyllong ha ka 3 tarik u bnai ban wan ia kaba la pynbeit hapdeng u DC bad ki tnad Sorkar baroh kiba don hapoh West Jaintia Hills.