Press "Enter" to skip to content

Shah tuh ka kali Sumo u nongtrei Post Office

Nongpoh, Jylliew, 19: Ki runar bym lah ban ithuh dur khmat hynnin ka miet ki laleit ban rong tuh ïa kawei ka Tata Sumo Gold na phyllaw Post Office ha Nongpoh kaba dei ruh jong u nongtrei katei ka Post Office ba u la set ïa ka ha ka jaka set kali.
Kane ka jingjia ka lahynnin ka miet ha ka por shiteng synñia eiei ha ka por ba ka pyrthei ka la kynjah jar, ha kaba ki runar ki la rung sha ka jaka set kali kaba don ha phyllaw katei ka Post Office da kaba pynpait ruh ïa 3 tylli ki tala kiba la khang ha khyrdop katei ka jaka set kali bad rong tuh syndon ïa katei ka Sumo na katei ka jaka set.
Katei ka Tata Sumo kaba la shah rong tuh ka dei jong u Ram Khelawan Sah kaba don ïa u Registration Number ML 08 F 82521.
Haba ïakren bad u Bah Lin Nongbri Post Master ka Post Office Nongpoh u la ong ba kane ka jingjia ka lajia ha ka por shiteng synñia eiei haduh ba u trai katei ka kali um ïoh sngew shuh ïa ka jingwan kitei ki nongtuh wat hadien ba ki lapynpait haduh 3 tylli ki tala kiba la khang ha khyrdop ka jaka set kali.
U la ong ruh ba kane kam dei shuh ka sien kaba nyngkong ba ki runar ki lawan ban swait ïa katei ka kali ha kaba ki runar ki lathmu ruh ban sei tuh ïa katei ka kali mynshuwa bad ha ka por ba ki mut ban sei u trai katei ka kali u la ïohsngew bad ki runar ki laphet krad khlem lap dien shuh.
“Dei ha kane ka kynti ba mynta bala suba ba lah ban dei ki juh ki runar, ki la wan biang ban rong tuh ïa katei ka kali wat hadien bala khang tala bha ïa ka khyrdop jaka set, khlem da ïoh sngew bad rong tuh syndon na katei ka jaka” la ong u Bah Nongbri da kaba bynrap ruh ba na ka liang ka ophis ki laphah peit ruh lyngba ki kor ring dur CCTV ha Toll Plaza kaba don ha Pahammawleiñ ha kaba la ïohi ba katei ka kali ka laïaid lyngba katei ka khyrdop khrong khajna ka NHAI ha ka por 1:30 mynstep.
Shuh shuh na ka liang u trai katei ka kali u la pyntip ruh sha ki bor pulit bad ujor da ka ejahar ban lapdien ïa katei ka kali bad dei ha ka por shiteng sngi ba la ïohi da ki katto katne ngut ki paidbah ba katei ka kali ka laieng harud surok ba rung na 13 mer ban mih sha Killing ba ki runar ki laieh ha katei ka jaka bad pyntip sha u trai katei ka kali.
Hadien bala lap dien ïa ïa katei ka kali na ka liang u trai bad ki pulit ki laleit ban shimti noh ïa katei ka kali na katei ka jaka, bad halor katei na ka liang ki bor pulit ki dang pynlong ka jingtohkit ban lapdien bad ïohkem ïa kitei ki runar kiba ju donkti ban rongtuh ïa ki kali ba la suba ruh ba kidei ki snar tuh kali.