Press "Enter" to skip to content

Thombor ka kynhun ki runar ïa u Rangbah Shnong ka Baridua

Nongpoh, Jylliew, 19: u Rangbah Shnong ka Baridua ha Ri Bhoi District mynta ka sngi u la shah hiar thma kynsan ha ki kynhun runar kumba 30 ngut ei ei kiba la wan beit sha ka ingsah jong u bad bom bad shoh ïa u naphang khlem kano kano ka jingïakren ne ban tip ïa ka daw tynrai.
Kane ka jingjia ka la jia mynta ka sngi ha ka por 3.30 baje janmiet ha kaba la ong ba kitei ki kynhun ki la shu wan beit kumba saw kali sha ka ingsah jong u ha Baridua bad ki la shoh pynmynsaw ïa u Rangbah Shnong.
Haba pyrshang ban wad jingtip na u Rangbah Shnong ka Baridua, u bah Ionnis Narleng u la iathuh ba kane ka jingjia ka la jia shisha bad kitei ki kynhun ki la wan beit sha ka ingsah jong u ban bom bad shoh pynmynsaw ïa u.
U la ïathuh ruh la kumno kumno ki don kumba 30 ngut ha katei ka jingwan hiar thma sha ïing jong u bad napdeng kitei ki 30 ngut u la ithuh durkhmat tang uwei u rangbah ba la tip kyrteng kum u Golden Star Khongwar.
“Ha kane ka jingshah hiar thma u la mynsaw na ki bynta jong ka dur khmat bad khamtam ba ki la kura bad bom ïa u khlem kano kano ka jingiakren” u la ong.
Haba pyrshang ban wad jingtip ïa ka daw, u Bah Narleng ula ong ba ka daw ka jingwan hiar thma jong ki, ka dei hi na ki kam shnong kam thaw ba ki kwah ban phiah ïa ka shnong ha ki ar bynta bad ba ki paidbah pat kim ai ka jingkyrshan ïa ki.
Halor kane ka jingjia, u la iathuh ba u la dep ruh ban ujor da ejahar ha Khanapara Police Station ban kem ïa kitei ki runar kiba don kti ban thombor ïa u bad u la kyrpad ïa ki bor ka aiñ ba kin kem mardor ïa kitei ki runar bad ban pynshitom katkum ki kyndon aiñ.