Press "Enter" to skip to content

Wan poi u Myntri, MP bad MLA na Punjab ban ïakren bad ka Sorkar

Shillong, Jylliew 19: Ka Kynhun ba la phah da u Myntri Rangbah ka Punjab u Capt. Amanrinder Singh hapoh ka jingïalam jong u Myntri ka tnad Water Resources u Sukhbinder Singh Randhawa, ki la wan poi mynta ka sngi balang ha nongbah Shillong na ka bynta ban ïakynduh bad ïakren ïa ki Myntri jong ka Sorkar MDA ha kane ka jylla na ka bynta ki jaidbynriew Sikh kiba shong basah ha Them Metor.
Kiwei kiba la ïapoi lang bad u Suhkbinder ki long u Ravneer SIngh Gill, u Jasbil Singh Gill kiba dei ki MP, u Kuldeep Singh Vaid bad u Kulbil Singh Zira kiba dei ki MLA.
Ka jingphah ïa kane ka kynhun sha kane ka jylla Meghalaya ka long ban wad jingtip aiu ka Sorkar Meghalaya ka leh na ka bynta ki jaidbynriew Sikh kiba sah ha Them Iew Mawlong hadien ba la byrngem ïa ki da ka seng kieng atiar HNLC ba lada kim kohnguh ban ïatreilang bad ka Sorkar ban kynriah na kane ka jaka kin ïakynduh ïa ka jingma ha ka jingim jong ki.
Ha ka jingshisha kane ka kynhun ka la dei ban ïakynduh ïa u Myntri Rangbah ka jylla u Conrad Sangma mynta hi ka miet sngi balang hynrei namarba u Myntri Rangbah u don sha ka jingïalang sha Delhi kumta kim shym la iohlad ban ïakynduh ïa u. Kane ka kynhun kan ïakynduh ïa u Symbud Myntri Rangbah, u Bah Prestone Tynsong, ïa u Myntri Kam Pohiing u James K Sangma mynta ka sngi palei.
Haba kren sha ki nongthoh khubor hadien ba la iuhkjat ha kane ka nongbah Shillong, u Randhavan u la ïathuh ba la phah ïa ki ban wan sha kane ka jylla da u Myntri Rangbah ka Punjab ban tip bniah la ki Sikh kiba sah ha Them Iew Mawlong ki shah thombor neem kumba la byrngem da ka seng kieng tiar HNLC.
“Ngin ban jur ïa ka Sorkar Jylla ban ym pynkynriah ïa ki Sikh na ka jaka ba ki la im la sah mynta la palat 150 snem. Kumta ka dei ka kamram jong ka Sorkar Jylla ban ai jingïada ïa k,” ki la ong.
U Sukhbinder u la ong “ki don bun ki samla pule na kane ka jylla kiba pule ha Punjab kumta ngim kwah ban don ka jingïasngew pher jaidbynriew ba kan jia tang na kane ka daw.” U la ong shuh shuh, “kine ki Sikh kiba sah ha Meghalaya kim dei ki poiwir. Ngi don ka jaka ha Punjab ha kaba ym don satia ba long trai mano mano ruh bad uno uno uba sah hangta u la dei hi u trai jaka. Kumta kine ruh ki la sah da ki spah snem kumta ngam sngewdei ba ka shonghok ban beh ïa ki da ka bor namar ym don uwei ruh uba kwah ban iehnoh ïa la ka jong ka iing ka sem.”.
Haba la kylli balei u wanrah ïa ka kyntien sngew pher jaidbynriew, u la jubab pat da kaba ong ba ki la wan sha kane ka jylla ban wanrah ïa ka khubor jong ka jingsuk bad ban jur ruh ïa ka sorkar Meghalaya ban pynneh pynsah ïa ka shongsuk shongsaiñ.
U Sukhbindar u la ong ruh ba ka lad kaba bha tam ban pynbeit ïa kane ka kam ka dei ban burom ïa ka rai jong ka Iing bishar bad ai ba ka Iingbishar kan ai rai halor kane.
Haba la pynpaw ba ka Sorkar ka kwah ban pynkynriah khnang ba kito kiba wan sah be-aiñ kin ym don jaka, u Sukbindar ula pynpaw ba ym don tharai kiba sah be-aiñ namar ki nongtrei Sorkar kiba la sah katta phew snem ha katei ka jaka ki la nang ïar u tnum u tyndai jong ki.
Kane ka kynhun ka la leit jngoh mynta hi ka janmiet sngi balang ïa ki longing Sikh ïa ka Them Metor bad ïakynduh ruh ïa ki dkhot jong ka Harijan Panchayat Committee (HPC).