Press "Enter" to skip to content

Ym pat pynkhreh ka Sorkar Jylla ban kyntiew Deficit ïa ki skul Adhoc

Shillong, Jylliew, 19: Ka tnat Pule Puthi jong ka Sorkar Jylla kam pat don satia kano kano ka jingpynkhreh ban kyntiew kyrdan Deficit ne Dificit Pattern ïa ki skul Adhoc kiba la don lypa ha ka jylla Meghlaya.
Ka kynhun ki nongïalam jong ka Federation of all Meghalaya Adhoc Secondary School Teacher Association (FAMASTA) ryngkat bad ka All Meghalaya Adhoc Upper Primary SchoolTeacher Association (AMAUPSTA) ki la ïoh ïa kane ka jubab kaba shai ha ka jingïakynduh jong ki ïa u Commissioner & Secretary ka tnat Pule Puthi ka Sorkar Jylla u Bah D.P Wahlang bad ïa u Director jong ka State Education and Literacy (SEL) u Ambrose Ch. Marak ha ka sngi baar mynta ka taiew.
“Na ka liang jong ngi ki ar kynhun ngi la dep kylli shai ha kaba ïadei bad ka jingkam jong ki nongïalam bym dei na ki sengAdhoc kiba la nud ban ai ïa ka jingkular ba kan urlong noh hapoh u snem 2019,” ong u President ka AMAUPS, u Bah B. Thabah.
“Kumta la kyrpad ïa ki para nonghikai Adhoc baroh ba kim dei ban shu pdiang ïa ka jingkren ba khlem nongrim jongno re jongno bad lada don ki jingbym shai dei ban kylli na ki nongïalam jong ki sengAdhoc,” ula bynrap.
Shwa kane, ki nongïalam jong kine ki ar kynhun ki la ïakynduh ïa u Myntri Rangbah ka Jylla, u Conrad K. Sangma ha ingsah jong u ban pynkynmaw biang sa shisien ha kaba ïadei bad ka jingdawa ban kyntiew kyrdan noh ïa baroh ki skul Adhoc ha ka Jylla sha ka Deficit Pattern.
“Hynrei na ka liang jong u Myntri Rangbah u la kren shai ba ym lah ban kyntiew kyrdan deficit lane Deficit Pattern, namar ka jinglut kan long palat 700 klur shibnai,” la ïathuh u Bah Thabah.
Na ka liang ki nongïalam jong kine ki seng nonghikai skul Adhoc ki la kyrpad ïa ka Sorkar Jylla ban pynkiew noh da ka jingsiew namar ba ïa mynta ka jingsiew ka dang rit palat katkum ka jingïaid jong ka por.
“U Myntri Rangbah u la kular ban pynheh (enhancement) ïa ka jingsiew tulop watla um shym la kular ban kyntiew kyrdan ïa ki skul Adhoc,” la ong shuh shuh u Bah Thabah.
Kine ki ar kynhun ki la leit ïakynduh ruh ïa u Myntri ka tnat Pule Puthi, u Ma Lahkmen Rymbui kumba la bthah da u Myntri Rangbah bad ka jubab kaba ki la ïoh ka long hi kajuh kumba ki la dep ïakren hashwa bad u Myntri Rangbah.