Press "Enter" to skip to content

Ba kyntait ka Sorkar ïa jingpan ka PHE, tuid ka umktieh na TP Mawphlang sha ki shnong

Kyndit ka Committee on Environment jongka ïingDorbar
Shillong, Jylliew 25 : Ka Committee on Enviroment jong ka Ïing Dorbar Thawaiñ ka Jylla ha ka sngi Ba-ar ka la lap ba ka jingkyntait jong ka sorkar ban ai ïa ka kor kaba 15 klur ban pynkhuid biang ïa ka umktieh kaba mih na Treatment Plan jong ka Greater Shillong Water Supply Scheme ha Mawphlang kadei ka dawbah kaba bun ki shnong kiba don sharum na katei ka jaka ban kynduh bun ki jingeh namar naduh ki wahrit haduh ki wahduid ki la dap lut da ka umktieh bad um jaboh kiba tuid nangtei.
Ïa kane la pynpaw da u Chairman ka Committee, Bah SK Sunn ba dei ruh u MLA ka Mawphlang ha ka jinghiar jurip jong ka Committee ïa ka Treatment Plan kumjuh ïa ki jaka pyllait ïa ka umktieh na katei ka jaka pynkhuid um kaba don ha Mawphlang.
Ha katei ka jingjurip la donlang ruh naduh u MLA ka Mawsynram, Bah HM Shangpliang, MLA ka Mawkyrwat, Bah Renikton Lyngdoh Tongkhar bad ka MLA jong ka Ampati, ka Miani D Shira.
“Ngi ïohi ba ka um ktieh kaba mih nangne la pyllait sharud bad nangtei pat kin sa tuid sha ki wah. Kumta baroh ki wah kiba don ha ki shnong ba sharum kin jaboh lut,” u la ong da kaba bynrap ba ki shnong kiba ju ngat ha katei ka apot ki kynthup ïa ka Lyngïong, Lyngkien, Sohiong bad kiwei kiwei.
U la ong ruh ba na ka Committee kan kyntu jur ïa ka sorkar ba kan peit bad shimkhia halor katei ka bynta namar ka ktah bad pynjaboh ym tang ïa ka mariang hynrei ban pyntikna ruh ba katei ka um jaboh kaba tuid lyngba ki wah kan ym poi sha ki paidbah.
“Na ka Committee ngin ai jingmut bad banjur ïa ka sorkar ba kan mang skim namar kadei ka kam kaba ktah ym tang ïa ka mariang hynrei ruh ïa ka bit ka biang jong ki paidbah nongshong shnong kumjuh ruh ïa ki dohum dohwah.”
Haba bynraplang, u Bah HM Shangpliang u la ong ba ka long ka bym itynnad ban ïohi bad tip ka um ktieh na katei ka jaka pynkhuid um ka tuid pynban sha ki wah kiba poi sha ki shnong briew. U ong ruh ba ha ka kor pynkhuid um la ju khleh lang ïa u alum bad ïa ka shun kumta lada jia ba katei ka umktieh ka poi sha ki wah paidbah kan buh ka jingma kaba khraw ïa ki paidbah. Shuh shuh u la ong ba ki la ïoh jingtip ruh ba ka sorkar jylla lyngba ka Planning Department haduh arsien ka la kyntait ïa ka jingtyrwa ka PHE ban don ïa ki kor ban pynkhuid ïa katei ka umktieh kaban shongdor kumba 15 klur tyngka ei ei. “Hynrei ka Planning Department ka kyntait haduh arsien khlem da sngewthuh ïa ka jingdonkam. Na ka liang ka sorkar kadei ban sngewthuh ba kadei na ka bynta ka jingdonkam ban pynkhuid ïa ka um,” u la bynrap biang.
U ong ruh ba kum ka Committee ki kwah ban ïohi ba ka PHE kadei ban don ïa ki kor ki bor kiba kham biang kiban lah ban pynsuk bad pynjanai shuh shuh ha ka jingpynkhuid ïa ka um shwa ban sam sha u paidbah.
Na ka liang ka Committee, ka banjur lang ba kin thoh sha ka sorkar ba kadei beit ban pynïoh ïa kitei ki kor kiban pynkhuid ïa ka umktieh kaba mih na ka Treatment Plan khnang ba ki shnong kiba don kham sharum kin ym mad shuh ïa ka jingma ne jingkordit.
La ïathuh ruh ba halor kitei ki jinglap baroh, ka Committee ka la khot hajir ïa ki tnad kiba don bynta ha kane ka sngi Balang ban ai ka jingpynshai.
Shwa kane, u Bah Sunn u la ong ruh ba ka Phase – 3 jong ka GSWSS kadei ka bynta kaba khraw bha ha kum kane ka juk ba ki ïakhun ïa ka jingkylla ka bor mariang. U ong ruh ba la kumno kumno ki khmih lynti ba ha u snem 2020 ka jinglait ei ka um na ki pipe ha ka lynti ïaid jong ka kan kham duna bad la kumno kumno haduh 60 persen kan poi sha u paidbah.
U la ong ruh ba namar ka jingeh jong ka PHE ban pynpoi ïa ki pipe sha ki shnong na ka daw ka jingkhanglad ka PWD, na ka liang ka Committee ka la khot hajir lang ha kane ka sngi Balang. Katkum ka jingïathuh jong u, tang na ka daw ka jingbym treilang ka PWD bad PHE, ki don haduh 10 tylli ki zone kiba dang sahteng ban pynpoi ïa ki pipe watla kadei na ka bynta ka jingmyntoi jong u paidbah.
Ha kajuh ka por u kyntu ruh ïa ka tnad PHE bad Forest ba kin shimkhia noh ban ïoh pynbna noh ïa ka shilynter ka tyllong um ba tuid sha Dam Mawphlang kum ka National Wetland khnang ba kin ïoh ïa ka jingdawa kaba kham paka
Ka Committee ha kane ka sngi ryngkat ka jingdonlang u Chief Engineer, Executive Engineer, SDO bad kiwei kiwei ki ophisar ka PHE ki la leit ruh ban jurip ïa ka jaka pynlang um, nangta ïa ka Pump House bad ruh ïa katei ka jaka pynkhuid um.