Press "Enter" to skip to content

Ka jingkyrpad ïa ki lad jingïarap halor ki Lanot ba shah lehbeiñ tam ha ka Jylla

Banangskhem Khongsdir, Umñiuh -Tmar.

Ha U
C.M., D.C Ek Hills , M.L.A, M.D.C ,D.H.O,Fisheries Dept, K.S.U, H.Y.C etc.
Sub: Ka jingkyrpad ba phin sngewbha ban thaw ki lad ki lynti jingïarap na ka bynta ki lanot ba shah lehbeiñ tam ha ka jylla.
Sir,Madam,
Katkum katei ka phang ba la kdew haneng nga kwah ban buh ka jingkyrpad rit ha khmat ka burom basbun jongphi kumne harum:
Ba ki trai bri, trai jaka ba don ha syndah u pud u sam Indo-Bangla kata naduh Nongjri Ilaka, Umñiuh -Tmar Ilaka Tynriang Ilaka bad Raid nong Shken Ilaka kiba don jaka ba duna ka jingjngai kumba 280 pruh (140 m) antad na u pud u sam, kin hap noh kum ki No man’s land ne Zero line. Ha kaba da ki bun bun lak square feet kine ki jaka kin kylla noh tang kum ki jaka Rngai.
Ba naduh 30 snem mynshuwa, ki trai bri , trai jaka ki ju khmih lynti bad ju ïaï ap ïa ki sngi kiba bha ynda la ker Border Fencing. Hynrei ka jingkhmih lynti ki la kylla pynban sha ka jingtim. Ki jingpynshai ki jingpynsngewthuh ka sorkar, ba ki trai jaka ki lah ban leit rep leit riang sha kine ki jaka, ka long pynban thik kum ka jingpynap shrip sha ka jingleit trei mraw ha ki khar Bangla.
Ba kine ki jaka ki la kylla kum ki jaka rngai, ba lada rep, lada thung tep ha kine ki jaka ruh ym long lada die noh sha India ruh ym don nongthied, bad lada die noh sha ki khar Bangla ruh ym don aiñ. Sha trai ruh ym don jaka sha kliar ruh ym don jaka, kine ki jaka ki la kylla long ruh kum ki jaka ha haw-haw.
Ba kane ka jingpynïakhlad ïa ki jaka jong ki trai bri ka la ring dur ha ka jingmut jingpyrkhat jong ngi ki nongrep, la kum ka jingpynap A.K-47 na shadem. Ha kaba ym don lad shuh ban dang ujor, hynrei tang ban shu sngap jar, ym don Black Money ne white money ba lah ban ïarap na ka Central Govt.
Ba lada don ka jingjulor na ka mariang, dang don ka disaster department , kata ruh long ka jingjulor ka rep ka riang ha ka shi aïom, ym ka jingduh ïa ki jaka shi spah ne shi hajar ryta, lada shah tuh shah lute shah demand pisa dang don u pulit ne Police Department dang don Court ban bishar. Hynrei ka jingduh ïa kine ki jaka ka pynshoh tyndep ne pynkylla mynsiem ‘ïakjakor ïa ki bor synshar ban shu hun beit ban pyneh dohnud khlem jingsngew wat tang ka ummat Crocodile ruh kim don.
Ba haba jan ïap jyllop, hap snoh ïa u khah ruh ne Something is better than nothing. Ka dei sa tang kane ka lad ba kine ki shem lanot ki ap khmih lynti na ki Nong Samaria ba bha. Lada phin shim ïa kane ka rai ka don ka lad. Lada don ka mon don ka lad.
Ba lada phi don ka mon, to shim kum ka hok long briew, shim ïa ka rai hok longtrai , shim ïa ka rai na ka bynta ka imlang ka sahlang ka bha ka miat. Lada phin shim ïa kine ki rai ki lad jingïarap ki don ha ki miej jong phi.
Ba kat kum kitei ki jingshisha ba la kdew haneng, lada phi don ka mon ban ïarap, ki katto katne ki jingkyrpad rit nga pashat ha ka bor bad ka burom jong phi.
(1) Ba phin sngewbha ban buh rekod ïa kito ki trai bri ba la hap noh ki jaka ha ka No Man’s Land.
(2) Ban thaw lad ba ki trai bri, kin buh Insurance ïa ki jingthung jingtep, lada kin leit rep ha kine ki jaka.
(3) Ban pynïoh pung dohkha ïa kito kiba don jaka bad tih pung dohkha shawei pat.
(4) Ban ai ki skhim rep sha kito ki trai jaka lada ki don jaka shawei pat.
(5) Ban ai M.L.A Scheme sha kine ki lanot ban rep ban riang khlem da ïa peit Party.
(6) Ban thawlad na ka M.D.C Scheme ban ïarap ban pynïoh skhim khlem da ïa peit Party.
(7) Kiwei pat ki lad jingïarap khamtam eh na u Chief Minister.
Lyngba ine i jingkyrpad rit, sa shisien nga buh ka jingkyntu ha ka burom ba sbun jong phi, kiba don ka jingkitkhlieh na ka bynta ki briew la jong, na ka bynta ki paradoh parasnam ba phin sngewbha ban shah shkor lem khnang ba phin sah ban ïa noh synñiang. Nga khmih lynti ruh ba ki Sengbha lang kiba ju ïai don ryngkat bad la ki paradoh para snam ha man la ki khyllipmat ba ki paidbah ki don jingeh, ba kin sngewbha ban shim khia lang ban tynrong ïa kane ka jingeh ba kine ki lanot ki hap ban mad ïa ka jingsngewsih ba kthang tam.
Ka jingnoh synñiang jong phi kan wallam ka jingkyrkhu ïa kine ki lanot. Ngi khmih lynti ïa ka jubab ba kyrpad rit.