Press "Enter" to skip to content

Mar syn ïakhih ki khynnah skul thung nonghikai shipor ka sorkar ha Sib Sing

Dei ba pynslem ai jingtip na ka skul : Lahkmen
Bun dei ki nonghikai shipor ba pynslem ka MPSC : Macmillan

Shillong, Jylliew 23 : Mar syn ïakhih ki khynnah skul Class XI bad XII jongka Sib Sing Memorial Government Higher Secondary School halor ka jingbym don nonghikai Biology hynnin ka sngi, mynta hi ka sngi ka sorkar ka la thung wut wut ïa u nonghikai na ka bynta katei ka subjek uba dei u Philanthrophis Sarubai.
Kat kum ka jingpynbna ba la pynmih mynta ka sngi la pynpaw ba ka jingthung ia une u Asst. Lecturer kan long tang shipor katba ym pat ïoh nonghikai ba pura ha katei ka skul ha ka jingsiew kaba da ka scale 42100-93900 tyngka shibnai bad kane kan long shwa na ka bynta 59 sngi naduh ka sngi ba u leit hikai ha ka jaka jongka kong C.Lyngdoh Tron Asst. Lecturer kaba shim shuti mynta ban leit bteng ïa ki jingpule.
Kane ka jingthung Asst. Lecturer kan kut noh hadien 59 sngi katba ym pat pynmih da kawei ka jingpynbna ne katba ka MPSC kam pat thung da u nonghikai ba pura. Wat la ka sorkar ka pynpaw ba ka jingthung Asst. Lecturer ka long naduh mynta ka sngi hynrei lada bishar bniah pat ïa ka tarik ba la thung ïa u Philanthrophis ka long naduh ka 13 tarik mynta u bnai. Ka jingkylli ka long hato ka dei ka jingbym leit shimti ïa katei ka kam hikai hadien ba la dep thung ne ka dei kaba shu ai tarik thok ka sorkar.
Katba haba ïakren bad u Myntri ka tnad pule puthi, u ma Lahkmen Rymbui u la ïathuh ka daw ka dei ka jingpynslem hi na ka skul ban ai jingtip namar hadien ba u Asst. Lecturer u la iehnoh kam bad la shimti da ka kong C Lyngdoh Tron bad kane ruh ka la leit shuti namar ka dang leit pyntbit ïalade, kumta na ka liang ki bor skul ki khlem pyntip sha ka sorkar halor kane bad dei na kane ka daw ba la slem ban thung nonghikai ha katei ka skul.
Na ka liang u MLA jongka Nongstoiñ u bah Macmillan Byrsat u la ïathuh ka daw baroh ka dei ka jingpynslem thung kam na ka MPSC namar kat haduh mynta kiba bun ki nonghikai ha katei ka skul Sib Sing Memorial Govt. Higher Secondary School, ki dei kiba la shu thung shipor ne officiate bad ka daw ka dei namar ba pynslem palat na ka MPSC ban pyndep ïa ka interview ban thung nonghikai.
U la ïathuh, kum u nongmihkhmat u ïai bud dien ïa kane ka kam bad halor kane ka jingthung noh mar mar ïa u nonghikai biology ruh u la bud dien na ki bor ba halor ba kin thung noh mar mar ïa kaba la thung ruh mynta hi ka sngi.
Lah ban pynkynmaw ba ki khynnah skul Class XI bad Class XII jong katei ka skul ki la ïakhih da kaba mih sha phyllaw ka skul ha ka Lah Sngi U Blei ryngkat ki lama ïong bad jingthoh, dei namar ba ki la sngewsoh sat palat namar naduh ba sdang ka skul mynta u snem kat haduh mynta kim pat ïoh nonghikai ïa ka subject Biology bad kane ka la buh ïa ki ha ka jingeh na ka bynta ka eksamin phainal jongki.