Press "Enter" to skip to content

Pynthikna u DC bym don shuh ka jingtih dewïong be-aiñ ha East Jaiñtia Hills

Khliehriat, Jylliew, 25: Ban pynthikna la ka jingtih dewïong be-aiñ ka dang bteng neem ha East Jaiñtia Hills District,mynta ka sngi baar ki bor synshar ka East Jaiñtia Hills District hapoh ka jingïalam u Deputy Commissioner, u Bah F.M.Dopth lem bad ki Magistrate, ki heh ophisar ka Tnat Pulit bad ki heh ophisar ka Sorkar Jylla ki la hiar jurip sha ki krem tih dewïong bad lap ruh ba kam shym la don shuh ka jingtih dewïong be-aiñ hapoh ka District baroh kawei.
Ha kane ka jingjurip ba la phiah ha ki saw bynta, u Deputy Commissioner lem bad ka kynhun ki la jurip ïa ka thaiñ Rymbai, Ïapmala ter ter, katba u ADC u Bah S.S Syiemlieh, u DySP u Bah Gillbert Marshillong lem bad ka kynhun ki la jurip ïa ka thaiñ Sutnga, Umpleng, Sakhaiñ ter ter, katba ka ADC ka Kong D.M Suja bad kynhun ki la jurip ïa ka thaiñ Sohkymphor bad u EAC u Bah S. Marweiñ bad ka kynhun ki la hiar jurip ïa ka thaiñ Khliehriat, Deiñchynrum, Ladrymbai, Dkhiah ter ter.
Kine ki kynhun ha kane ka jinghiar jurip ki la lap ba ym don shuh ka jingtih dewïong thymmai na ki krem tih dewïong hynrei la lap sa tang u dewïong ba ladep kham mynshwa ïa uba la shu lum thup da ki nongtih bad ki nongkhaii dewïong naduh ba la khang da ka National Green Tribunal.
La lap ruh ïa ki iingsah shipor (Camp) kim don briew shuh. Ïa ki mashin bad ïa ki tiar tih dewïong la shu ieh sarang kumto ha khlaw.
Na ka liang u Deputy Commissioner, u Bah FM Dopth bad u ADC, u Bah S.S Syiemlieh hadien ka jing jurip ki la pynthikna ba ha East Jaiñtia Hills District kam don shuh ka jingtih dewïong be-aiñ da ki paidbah kumba ju long ha kiwei pat ki bnai baladep. U DC u la ïathuh ba ka jinglum thup ïa u dewïong harud ki par dewïong u dei uba ki nongkhaii dewïong kim shym la ïohlad satia ban khaii ne shalan naduh ba la khang da ka National Green tribunal. “La ithuh ruh ba um dei satia u dewïong ba shu tih thymmai,” ong u ADC u Bah S.Syiemlieh.
Kum ban shu kdew hangne, ka National Green Tribunal ka la pynjari da ka aiñ ban khang ïa ka jingtih dewïong thliew khnai ha ka Jylla Meghalaya naduh u bnai Ïaiong, 2014, hynrei ka la ailad pat ban shalan na ka por sha ka por ïa u dewïong ba ladep tih hadien ba la lum jingkheiñ ïa u dewïong ba ladep tih. Naduh ba la pynjari ïa ka jingkhang ban tih bad shalan dewïong ha ka jylla, da ki phew tylli ki trok kit dewïong be-aiñ ki la shahkem ha ki Pulit na ki bynta bapher bapher ha rilum Jaiñtia, East Khasi Hills bad Ri Bhoi Districts.
Ka jingkhang ïa ka jingtih dewïong ka la ktah ïa ka jakpoh jong ki hajar ngut ki longing ha rilum Jaiñtia kiba shahniah ïa ka ïoh ka kot na ka kam tih bad shalan dewïong.