Press "Enter" to skip to content

Shong syier ka shnong ka thaw

Ka shnong ka thaw ha man la ki dong ne ki shnat jong ka sor bad khap sor, ka don hapdeng ka jingshong syier, namar ka jingkyrni palat pud ki khun samla ban pyndonkam ïa u drok, ka la wanrah ïa ki har rukom ki jingjia kiba la poi wat shaduh u pud ban da shim ïa ki mynsiem briew kiba lui lui.
Khlem da kyrtiang dien shuh ïa kaei kaba la dep ban jia shen, u drok hi kum ba ka long mynta, ka la pynduh dem pynduh thiah ïa u paidbah nong shnong shnong, namar kat shaba ki phai la lap bad shem ba ki khmat dur ba lui lui ki khun samla, kine I kumba ki la shu shoh samtawi ha thwei jong ka jingbuaid drok, kaba ktah ïa ka bor pyrkhat jong ki khun samla, tad haduh ba kim tip briew shuh ïa ka kam aiu ba ki la dep ba kin leh ha ka jingim ka jong ki.
Sngew synei ïa kito ki longïing ki longsem ba don ki khun samla ba ngat ha u drok, ka jingim kaba dang mynnin ba mynshi sngi jong ki khun samla, mynta la wan ban kah dum noh ha ka jingim ka jong ki, kaba tang ka syrngiew jong ka jingïap kaba la ap hi kmang ba kan wan shaw noh shiteng por ïa ki na kane ka sla jong ka pyrthei.
Hynrei kaba pynpang mynsiem pat dei ïa ki longing ba la ngat ha ki kti ba snar jong ki nongdih drok, kiba kai sawdong ki dong ki shnong ban ap hi kmang ban ioh ban prong tuh ïa ki ïing ki sem jong ki briew kiba la khang khyrdep ïa la ki ïing naka bynta ban leit ban kamai ban kajih, pynban ki nongdih drok ki shim ïa ka kabu ban prong tuh ban kner katba ioh ka kti ban rong ne ban tuh ïa ki mar ki mata bad ki jingdon jingem jong ki ïing ki sem jong ki briew.
Kumta la donkam mardor ban wad ïa ki lad ki lynti kumno ban ieng ban ïakhun ïa kane ka jingma kaba ap hi kliaw ïa ki khun samla, namar lada shu ïa ksan ñia ksan jutang tang na ki rympei ïing, kan nym wanrah satia ïa kano kano ka jingmyntoi, katba khlieh la ki sngi, ki khun samla ki dang ïai liat ne ngop ha ka jingsdang ban mad ïa ka jingim ban shah kynnoh ‘men dih drok’.
Hap ban pyrto ïa ka kam ba radbah ïa ka tnat pulit ba ki ïai bteng ba kin shim ha ki ïa ka thong ban ieng ïakhun ïa kane ka thma ban kem ïa ki nongdie, hynrei ka jingkem tad haduh mynta mynne lah ban ong ba ka shu long tang ïa ki barit baria, hynrei ïa kita ki snar nongwan pynpoi ïa u drok ha kane ka jylla, haduh mynta mynne imat ym don ba lah ban lap ksai, hangne keiñ ka buh shisha ïa ka tnat pulit ba kan mad ïa ka jingeh ïa kane ka thma ba ki ïakhun, namar lymda lap naduh tynrai ïa ki kam kiba sniew wat mut ban lah ban rat dyngkhong, pynban kan shu long shisha tang kum ka thma ba la ieng ïakhun hynrei ba la iohi lypa ïa ka dak jong ka jingshah rem na sha lyndet.
Kumta la donkam ïa ki bor synshar naduh ka sorkar jylla, ki paidbah nong shnong shnong ban ïa ai pura ka kti kamon ka kti kadiang ïa ka tnat pulit jong ka jylla, ban ïa snoh kti lang bad ki ban ieng ban ïakhun da kaba tyngeh ïa ka thma ba la wan shong kulai jong u drok ha ka met ka longrynieng kiba bun ki khun samla, ki longkmie ki longkpa, kin hap ban sneng ban kraw ne ban buddien ïa ka ïaid ka ieng jong ki khun, hap ban shim khia da kaba ïai syllok lang bad ki na ka por sha ka por, lada don kano kano ka dak ba ipher ha ka jingim, mardor ïa syllok bad ki khun, wat ieh marwei ïa ki, namar na la rympei la lah ban tehlakam, la lah lypa ban ieng ban ïakhun pat sa shabar.
Toi ka la mih ruh ka jingkyntu ba ïa ki samla ba la ngop ha u drok donkam ban tyngkai pat ïa u dieng sympat, shi ban sngew ïahap ïa ka, hynrei kum ka shnong ka thaw ne ha ka imlang ka sahlang, lada ki kam pyntriem ki sdang ban pynthut ïa ka shongsuk ka shongsain, ïa ka ïaid ka ieng, da lei lei yn nym lah ban khlem da ai jingsneng, tangba hap ban long kiba ïa phikir ne ban ïa peitngor ba kam dei ba kan long shaba palat pud, ba tad haduh ban nym lah ban tehlakam pat ïa u paidbhur ba un nym tam palat ban ïa pud, pynban kumba ka long ïa mynta, ka shong ka thaw ka tieng ka syier, katno tam lei lei haba la sdang ban kem dum ka bneng, ha kaba baroh baroh kin ïa khohreh ban ïa her sha la ki ïing sha ki sem, ka kmie u kpa ba don ki khun samla, ki syier thot thot ka mynsiem shano ba ki khun kim pat wan ba kin rung sha la ïing la sem, shano ki leit shano ki wan, kin thnam ka janor bad pisa ka mynsiem, katba kim pat lah ban iohi ïa ka dur khmat jong ki khun ba kin wan ieng hakhmat ban ong Mei ne Pa ngi la wan ïing.
Kumta, kaba shah hakhmat ka long donkam ban ïa trei lang naka bynta ban tehlakam ïa ka jingpyndonkam pathar ki samla ïa u drok, hap ban ïa snoh kti lang kawei ne ban thaw ïa ki lad ki lynti ban hikai ïa ki khun samla, da kumno ba kin lah ba kin kiar ia la ka jingim ban nym shah pynngop ha u drok, ki samla ruh kin hap ban long kiba shalak ban jied ïa ki paralok haka jingim ka jong ki, ha kaba wei haba ki ipher ka jingim jingman ka jong ki, kan bha ban phla lut shwa ha la ïing ha la sem, ne ïarap ban pynïathuh lem ïa ki kmie ki kpa khnang ba kin ioh ban sneng ban kraw ïa la ki khun ki kti ban lait na ka jingim ba kordit shah the mraw shi junom ha u drok bad ka shnong ka thaw kan lait na ka jingshong syier.