Press "Enter" to skip to content

Yn pynlong ka New Era S&CC bad MBA ïa ka ïakob ïa kura ka BFI ha Shillong

Shillong, Jylliew 25: Ka khubor ba sngewtynnad ïa ki rang ne wat ïa ki thei ïa kura jong ka jylla hadien ba ka New Era Sports, Socio and Cultural Club ryngkat ka Meghalaya Boxing Asso-ciation, ki la shim ïa ka sien jam da kaban wanrah ïa ka rynsan ïa kura ba tip ïa ka kum ka 2’nd BFI Elite Men’s East Zone Boxing Championship 2019 kaban long ha kane ka nongbah Shillong..
Haba ïakren bad ki lad pathai khubor hynne ka sngi u bah Larry Kharpran Secretary ka MBA bad u Dinesh Biswa Secretary jong ka New Era S&CFC ki pyntip ba kane ka rynsan ïakhun ki rang ba kynsai ki thaiñ lam mihngi jong ka ri la buh ban pynlong ïa ka ha ki ar sngi katta ha ka 3 bad ka 4 tarik u bnai Naitung u ban wan, ha Tirot Sing Indoor Stadium.
U Bah Larry u ïathuh ba ka jingioh lad ka MBA ryngkat ka New Era S&CC ban wanrah ïa kane ka rynsan ïakhun ha kane ka nongbah ka dei hadien ba ka synjuk ba dei khmih ïa ka boxing ha ka ri ne ka Boxing Federation of India (BFI), ka la shim ïa ka rai ba man la ki dong ne ki thaiñ jong ka ri yn phiah ïa ki ha la ki jong ki thaiñ ne bynta kiban don baroh haduh phra tylli, ha kaba ka East Zone ka kynthup ïa ki jylla kum ka Meghalaya, West Bengal, Assam bad Sikkim.
Dei na kum kine ki rynsan ïakhun ba ki nongjop na kine ki jingïakob kin bteng ïa ka lynti ïaid ka jong ki da kaba kin mihkhmat ïa la ka jong ka thaiñ (zone) sha ka rynsan bah ïalehkai Inter Zonal Boxing Championship kiba ka BFI kan sa pynlong ha ki bnai ba kham shadien jong u snem.
Ki aiñ ki kanun jong kane ka jingïakob kin dei kat kumba la pruid dak ïa ka da ka Asian Olympic Boxing, kaban don lai kylla kaba lai minit shi kylla bad ka por ban shongthait ka long shi minit ha man la ki kylla.
Ïa ka jingïakob la phiah ïa ki kat kum ki kyrdan jingkhia kaba kynthup ïa 46-49kg (Light Fly), 52kg (Fly), 56kg (Bantam), 60kg (Light), 64kg (Light Welter), 69kg (Welter), 75kg (Middle).
Ki referee bad ki nongbishar ban wan ban pynïaid ïa kane ka jingïakob kin dei ki briew kiba la ithuh jong ka BFI.
“Ka daw kaba pynlong ïa ngi ban shim ïa kane ka sien jam ban ïa trei lang bad ka MBA ban wanrah ïa kane ka rynsan ïa kura ka long ba ngi thrang naka bynta ban plie lad ïa la ki khun samla jong kane ka jylla ba don ïa ka sap ba kin ioh ïa ka lad ba kin ïa tynjuh bor bad kiwei pat ki rang ïa kura ba paw na ka thaiñ ba la pynïakap ïa ka jylla ka jong ngi” la pynpaw u Dinesh Biswa President ka New Era S&CC.
Katba na ka liang u bah Larry Kharpran, Secretary jong ka MBA u shim ïa ka kabu ban pynithuh sha ki paidbah ïa ki rang ïa kura ka jylla kiban aireng ha kane ka rynsan ïakhun bad ki kyrteng jong ki hynñiew ngut ki rang ïa kura ki long Siewdorlang Syiemiong – 49kg, Shanborlang Marbaniang 52kg, Pynskhem L Nonglait – 56kg, Baiamutlang Sungoh – 60kg, Lurshai Nongkhlaw-64kg, Arthur Cornelli Khongioh-69kg bad u Erick Khongsit 75kg.
U Kongsan ban plie ïa ka pyrda kane ka jingïakob ba ar sngi un long u bah Banteidor Lyngdoh myntri ba dei khmih ïa ka tnat Sports & Youth Affairs ka sorkar jylla bad ha ka sngi ba kut yn wan ban sakhi lang da u MDC ba dei artad u EM ka KHADC u bah Paul Lyngdoh.