Press "Enter" to skip to content

Ai jingmut ka NCSK ïa ka Sorkar ban ym pynkynriah ïa ki Sikh na Them Iew Mawlong

Shillong, Jylliew, 27: Ka National Commission for Safai Karamcharis (NCSK) ka la rai ban ai jingmut ïa ka Sorkar Meghalaya Democratic Alliance (MDA) kaba bat ïa u lakam synshar ha ka jylla ba kan ym pynkynriah ïa ki jaidbynriew Sikh kiba shong basah ha Them Iew Mawlong.
Ïa kane la pyntip da u dkhot ka NCSK u Jagdish Hiremani ha ka jingwan iuhkjat ba ar sngi ha kane ka nongbah Shillong ban sngew bad sngap ïa ki jingeh jong ki Safai Karamchari kiba trei ha ki shnat treikam ka Sorkar Jylla.
U Hiremani haba kren sha ki lad pathai khubor u la ong ba ka Sorkar Jylla ka dei ban ap ïa ka kaiphod jong ka High Level Committee ka ban wad ïa kiwei pat ki lad ki lynti halor kane ka ishu bad ban ap ruh ïa ka rai jong ka Ingbishar Meghalaya High Court halor kane ka kam.
Une u dkhot ka Commission u la leit jurip bad ïakynduh ruh ïa ki Sikh kiba sah ha Them Iew Mawlong bad ïa ki Ophisar jong ki tnat treikam bapher bapher ka Sorkar Jylla. U Hiremani u la kynthoh ruh ïa ka High Level Committee halor ka jingkynnoh ba ka la shu shim kyrkieh ïa ka rai ban ai Notis sha ki briew kiba sah ha Them Iew Mawlong watla ha ka jingshisha kane ka kam haduh mynta ka dang sah pohding ha ka miej jong ka Ingbishar bad nalorkata, ka Committee kam pat pyndep satia ïa ka jingtreikam kat kumba la bthah.
Lah ban kdew hangne ba dei lyngba ka jingbthah jong ka High Level Committee, ka Shillong Municipal Board (SMB) ka la sam ïa ki notis sha ki briew kiba sah ha Them Iew Mawlong kum shi bynta ban lum jingkheiñ ïa ka jingdon jong ki briew ba sah ha kane ka jaka. La bthah ruh ïa ki briew kiba sah ha kane ka jaka ba ki aiti ïa ki kot ki sla sha ka Municipal hapoh shibnai.
Hynrei, une u dkhot ka NCSK u la ong ba kine ki briew kiba sah ha Them Iew Mawlong ki dei kiba la ai ka jingshakri ïa ka Sorkar la 200 snem bad ïa kane ka jaka la aiti ïa ki da u Syiem ka Hima Mylliem.
Haba pynpaw ïa ka jingdonkam ban ai ïa ki lad jingmyntoi sha ki briew kiba sah ha Them Iew Mawlong, u Hiremani u la kular ba ka Commisison ka long kaba kloi ban mang jingïarap pisa na ka Prime Minister Housing Scheme lada ka Sorkar Jylla ka phah ïa ka jingtyrwa.
U la kdew ruh ba katkum ka rai ba la pynmih da ka Iingbishar Supreme Court ha u snem 1972 ka la bthah ba kino kino ki briew kiba lum ïa ki jaboh jabaiñ ha baroh kawei ka ri India ki dei ban ïoh ïa ka jaka shong jaka sah kaba biang da kaba aikam ïa ki, ai jinghikai, pynshong skul, pynbiang ïa ka koit ka khiah bad ka jingpynshna ing shna sem.
Katkum ka jingong jong une u dkhot ka NCSK, ïa kane ka ishu la dei ban pynkut naduh u snem 1972-73 lada ka Sorkar Jylla ka bud ïa kane ka Hukum ba la pynjari da ka Iingbishar the Supreme Court.
Ha kajuh ka por, u la kyntu ïa ka Sorkar Meghalaya ba ka dei ban ai baroh ki jingmyntoi ïa ki Safai Karmacharis naduh ka jaka sah kaba biang, ka koit ka khiah, ka pule puthi bad ka kam ka jam.
U la kdew ruh ba ym tang ha Meghalaya marwei kaba la mad ïa kane ka jingeh hynrei kiwei ki jylla kiba la mad ïa kane kajuh ka jingeh kum ka Jylla Karnataka, Maharashtra, Tamil Nadu ki ladep pynbeit naduh mynno.