Press "Enter" to skip to content

Ba shah byrngem hap pahara ki pulit ïa uba ujor Lokayukta ïa u MDC

Tura, Jylliew 27 : Ïa ka mukotduma Lokayukta ba nyngkong eh ha ka Jylla kaba kynnoh ïa ka jingbamsap jong u MDC ka GHADC, u Ismail Marak la dep ban tian bishar ha kane ka sngi Balang.
Hynrei ha ka por ba tian bishar, ki pulit ki la phah ïa ka kaiphod tohkit halor katei ka jingkynnoh ba la phah da u nongujor, u Nilbath Ch Marak.
Na ka liang u Chairperson ka Meghalaya Lokayukta u la bthah ruh ïa ki pulit ka East Garo Hills (EGH) ba kin peit bniah halor ka jingshah byrngem jong utei u nongujor, ha kaba ki pulit ki la hap ban ai ka jingpahara ïa ka ïingsah jong u ha Williamnagar.
Katei ka jingpan jingpahara jong u Nilbath katkum ka jingujor ka long ba ki don bun ki briew kiba byrngem ïa u hadien ba u la ujor pyrshah ba ka don ka jingbamsap da utei u MDC.
Na ka liang u nongiasaid jong utei u nongujor u la ong ruh ba ka la don ka jingbthah ïa u SP ka East Garo Hills ban tohkit halor katei ka jingshah byrngem bad ruh ban ai ka jingpahara ïa ka ïing jong u nalor ba u hap ruh ban phah ïa ka kaiphod sha u DGP ka Jylla.
La ong ruh ba u Nilbath ha ka 4tarik u Jymmang u la ujor ïa ka mukotduma kaba nyngkong eh ha ka jingtreikam jong ka Lokayukta ha Meghalaya kaba la kynnoh ba ka don ka jingpyndonkam bakla ïa ka pisa kaba 1klur tyngka na ka song pisa ban leh ïa ki kam pynroi ha ka jylla jong u snem 2017 -18. Utei u nongujor u la kynnoh ba ïa katei ka jingujor kadei katkum ka kaiphod RTI ba u ioh na ka ophis GHADC.