Press "Enter" to skip to content

Da ka kali kit nongpang, noh synñiang u MLA ka Ranikor ïa ka Khonjoy PHC

Mawkyrwat, Jylliew 27: U bah Pius Marweiñ, MLA ka Ranikor Constituency mynha ka sngi balang jong ka taïew 26/6/2019 ha ryngkat ka jingïadonlang jong ki paidbah ka thaiñ Khonjoy lem bad ki officer Sorkar ula ïoh ban noh synñiang da ka kali kit nongpang (Ambulance) na ka bynta ka jingdonkam hapoh ka Khonjoy PHC.
Na ka liang u bah Pius Marweiñ, MLA ka Ranikor Constituency ha ka jingkren jong u ha ka jingïalang ba lyngkot, ula pynpaw ba ka jingnoh synñiang jong u da kane ka kali kit nongpang ka long ba na ka liang jong u, ula don ka jingangnud la slem hynrei namar ki jingeh kiba bun u khlem lah ban pynurlong ïa kane ka jingthmu.
Hynrei dei tat hadien ba ula ïoh ïa ka jingjop kum u MLA ula ïoh ka lad ban jurip ïa kane ka Khonjoy PHC bad lap shibun ki jingduna hapoh kane ka PHC, hynrei da ka jingsngewkhia ha ryngkat ka jingtrei shitom kum u MLA ula ïoh ka lad ban ïa mir jingmut bad ka tnad ka koit ka khiah ha kaba kumno ban pynbiang ïa ki nongtrei hapoh kane ka PHC ha kaba la ïoh ban buh ïa u doktor bad ki nurse bad kiwei kiwei de ki jingdonkam.
Shuh shuh na ka liang jong u MLA ula ïathuh ba ki don shibun ki jingduna namar ka um ruh kam biang, ka bording ruh kam da biang hynrei haba ïa dei bad kine na ka liang jong u MLA ula ïoh ban ïa kren bad ki officer ba dei peit ba kin leh ïa kaba donkam khnang ba ka jingai jingshakri ha kaba ïa dei bad ka koit ka khiah kan ym long kaba leh noh ei hapoh kane ka Khonjoy PHC.
Ha ka jingkren jong u bah H.S. Diengdoh, MCS, SDO ka Ranikor Civil Sub Division pat ula pynpaw ka jingaikhublei na ka bynta ka jingleh bha jong u MLA ha kaba ula ai sngewbha da ka kali kit nongpang hapoh ka Khonjoy PHC ha kaba ka long ruh kum kawei na ki lad ban ai jingai jingshakri kiba khraw na ka bynta ki paidbah kiba donkam ka jingïarap ha ka liang ka koit ka khiah bad u da kyntu ruh ïa ka committee ba dei peit ïa kane ka kali ba dei ban sumar bha bad pyndonkam hok ïa ka kum ka kali la jong bad ba kan long ruh kum ka atiar ban ai jingïarap na ka bynta kiba donkam jingïarap. “Lada don u doktor bad ki dawai kata ka lah long lypa ka jingpynbiang na ka bynta u paidbah ba bun balang kiba donkam ka jingïarap ha ka liang ka koit ka khiah”, ong u bah Diengdoh.
Ha kane ka sngi la ïoh ruh ban pynlong ka jingïalang kaba lyngkot ha kaba ki nongkren ki kynthup ïa u bah G.J. Sangma, Sorkar Shnong jong ka Khonjoy – B, u bah H.S. Diengdoh, MCS, SDO ka Ranikor Civil Sub Division, u Block Development Officer ka Ranikor, u bah Purison Sangma, u bah Nassar Marweiñ, MDC, u bah Pius Marweiñ, MLA ka Ranikor Constituency, ka jingrwai kyrpang na ka Chibak Church Choir bad ka jingduwai na u bah Climston R. Marak.
Ha kane ka sngi na ka liang ki nongthoh khubor ha ka jingïoh ban ïakren bad ki nongtrei hapoh kane ka Khonjoy PHC ki la pynpaw ba hapoh kane ka PHC ki dang don shibun ki jingduna kum ka um, ka bording, ka jaka sah (quarter) bad kiwei kiwei de jingduna. Shuh shuh ki la ïathuh ruh ba hapoh kane ka PHC ki don 5 tylli ki jingthiah na ka bynta ki nongpang, ki nongtrei pat ki don baroh 14 ngut bad kane ka Khonjoy PHC ka kdup de ïa ki 24 tylli ki Shnong bad ruh ka don ruh ïa ki ar tylli ki Sub Centres kata ka Meheshkola kaba kat haduh mynta ka ïing jong kane ka Sub Centre kam shym la ïoh ban pynbha (repair) namar ka la sniew bad hapoh ka Gillagora pat haduh mynta ym pat don ïing ban buh ïa ki tiar ki tar jingdonkam.