Press "Enter" to skip to content

Da kawei ka sur yn leit mih ki State Planning Board ka NE hakhmat u PM

Ban ïoh khambun ka mang tyngka ha ki jylla
Shillong, Jylliew 27 : Ha ka sien kaba nyngkong eh, ki State Planning Board jong ka thaiñ shatei lam-mihngi jong ka Ri kin tylli lang kawei ka sur ban pynsngew ha u Myntri Rangbahduh ka Ri khnang ba ka sorkar pdeng kan mang tyngka kham pahuh ha ki 8 tylli ki jylla ka thaiñ na ka bynta ki kam pynroi.
Katei ka rai ban tehsong lang ïa baroh ki Chairman jong ki State Planning Board jong ki jylla kane ka thaiñ ka la mih ha ka jingkynduhlang hapdeng ki nongïalam na ka Tripura State Planning Board bad u Chairman ka Meghalaya State Planning Board, Bah Lambor Malngiang ha kane ka sngi Balang.
La ong ruh ba ka jingwan kynduh na ka Tripura SPB ïa u Chairman ka Meghalaya State Planning Board kadei da ka jingbthah jong u Myntri Rangbah katei ka jylla, u Biplab Kumar Deb uba dei ruh u Chairman jong ka Tripura SPB. Ha kane ka sngi ïa ka kynhun na Tripura la lamkhmat da u Priya Ranjan Swarup uba dei u dkhot jong ka Board.
Ha ka jingïakren bad u Bah Lambor, la ïathuh ba ka thong kaba hakhmat hi ka long ba ki kwah ba ka Tripura bad Meghalaya hi kin maitphang ban lum lang ïa baroh ki Chairman jong ki State Planning Board jong ki phra tylli ki jylla ka thaiñ shatei lam-mihngi jong ka Ri khnang ba ka sur jong ki kan khlaiñ lada ki leit kum ka kynhun ban dawa ïa ki song kam pynroi na ka bynta kitei ki jylla.
“Ka la mih ruh ka jingïakren ba tad haduh mynta hi lada ki jylla na ka thaiñ ki pan 100 kin ïoh eh tang 20 persen, kumta ka buh jingeh ïa kito ki jylla ban pyndep ïa ki kam bad bunsien ruh ki sahteng wat hadien san snem ruh,” ong u Bah Lambor.
U la ong ka la don ruh ka jingpynbeit ba kan don shwa ka jingkynduh lang jong baroh ki Chairman bad ki dkhot jong ki Board na ki phra tylli ki jylla ha kine ki shibnai arbnai ban wan ha Tripura. “Hadien katei ka jingïalang kan sa don pat sa ka General Council, kaban long ka rynsan ïatai kaba khamheh ha kane ka jylla shwa ban ïaid shakhmat ïa ka kam,” u la ong da kaba bynrap ba nangtei hi kin sa shim ïa ki rai ba kum ka kynhun kin leit ban pynsngew beit beit markhmat haduh u Myntri Rangbahduh ka Ri ïa kaei kaba ki jylla bad ka thaiñ ki donkam.