Press "Enter" to skip to content

Dang tohkit ïa ki 2 ngut halor ka jingïap ka Asst.Manager MTDC : Spl.SP (CID)

Shillong, Jylliew 27 : Ka jingtohkit ia ki arngut ki briew kiba la leit pyndem bad kem da ki pulit jongka Nongpoh Police Station ha ka 22 tarik mynta u bnai, u Shanborlang Rani ba la tip da ka kyrteng sin kum u Deng Deng bad ka Grace Mery Kharumlong ha kaba ïadei bad ka jingshah pyniap jong ka Asst. Manager jongka MTDC, Polo I kong Iohbianghun Sahkhar, ka dang ïaid shakhmat.
Kitei ki arngut kiba dei shi kurim kata u Shanborlang bad Grace Mery ki sah ha Mawiong Umjapung Block C . Ka address tynrai jongki kat kum ka jingïathuh ki pulit ka long, u Shanbor u dei na Mawlai Syllaikariah bad ka Grace pat ka dei na ka Mawlai Mawtawar.
Haba ïakren bad ka Spl. SP (CID) ka Mary G.T Sangma, ka la ïathuh “ Hadien ba ki pulit ki la pynmih ka jingpynbna ba ki thwet jur ïa kitei ki arngut ha ka 21 tarik, ha ka sngi ba bud kata ha 22 tarik ki la wan ban pyndem hakhmat ki pulit ha Nongpoh bad hadien ka jingtohkit la kem noh ïa ki. Na ka liang ka ïing bishar ruh ka la ai por 12 sngi ïa ki pulit ban set byndi ïa ki khnang ban ïoh tohkit bniah bha ïa ki. La hap ai da ka jingpynbna namar haba ki pulit ki la thwet jur ruh kim lap satia iaki. Namar kine ki dei kiba la suba jur da ki pulit ba ki donkti ha katei ka jingshah pyniap jong ka kong Iohbianghun. Mynta ki dang don ha kti ki pulit bad ka jingtohkit ïa ki ka dang ïaid shakhmat. Kumta ym pat lah ban ong la ki dei kiba donkti shisha ne em namar ka jingtohkit ïa ki ka dang ïaid beit shakhmat”.
Lah ban pynkynmaw ba ka kong Iohbianghun
kaba sah ha Umpling, Shillong ka la mih na la ïing ha ka step 6 tarik mynta u bnai da ka jingthmu ban leit sha ophis sha MTDC Orchid Polo. Hynrei haba la janmiet ka khlem wan phai ïing bad haba kiba haïing ki la tohkit ki la tip ba kam shym la poi sha jingtrei. Ha katei kajuh ka janmiet kiba haïing ki la ïoh ka jingpyntip na ki pulit Umiam ba la lap ïa ka metiap jongka napoh khlaw na Umbir bad la ïohi nyngkong ïa ka metiap da ki kynthei katei ka thaiñ kiba leit wad tit sha katei ka jaka. Ki pulit ki la ïoh jingtip ïa ka jaka sah ba thikna jong i kong Iohbianghun na ki kot ki sla, ki identity card bad phone bad la ïoh kurup ryngkat bad ka beg na ka jaka ba lap ïa ka metiap.
Haba ki pulit ki la leit ban shimti ïa ka met ki la lap ruh ba la teh syngit bha da u tyllai plastic na ryndang bad teh ha u dieng tangba u tyllai u hap beit ha madan bad ka met ruh ka thiah lyngktar beit ha madan khlem kino ki dak ïaksaid. Kumta ki pulit ki la suba jur ba ka dei ka jingshah pyniap bad la shu teh tang ban kynnoh ba ka pyniap hi.
Hadien kane ïa ka jingtohkit la shimti noh da ki pulit ka CID bad dei haba la sdang ka jingtohkti bad lap ksai ba ki sa thwet ïa kitei ki arngut bad haba kim lap ki sa ai da ka jingpynbna ha ka 21 tarik mynta u bnai lyngba ki lad pathai khubor bad mar ïa ai ha ka sngi ba bud ki la leit pyndem noh hakhmat ki pulit ka Nongpoh kata ha ktei ka 22 tarik.
Haba pyrshang ban tohkit na ki pulit ïa ka daw jong ka jingshah pyniap ka kong Iohbianghun, ki pulit ki la ïathuh ba ka jingtohkit ïa ki arngut ka dang ïaid shakhmat ban lap ïa ka jingshisha halor ka jingjia. Nalor kane ki pulit ki ïathuh ruh ba ki dang tohkit ban lap ïoh dang don kiwei kiba ïadon kti lang bad kumjuh ruh kumno bad hangno ki ïa kynduh ïa ka kong Iohbianghun ha katei ka 6 tarik lane la ka jingshah pyniap ka dei ha katei ka jaka ne la pyniap shawei sa wan bret ïa ka met ha katei ka jaka ruh.