Press "Enter" to skip to content

Hukum ka Hima Mylliem ban plie ïa ka ïew, kyntait ba shalan sha B’desh

Watla jur ka jingpyrshah thied masi na ïew Khanapara
Nongpoh, Jylliew, 27: Ka Hima Mylliem wat hapdeng ka jingpyrshah kaba jur na ka seng ki nongotdoh halor ka jingdie Masi na ka iew ha Khanapara, hynrei mynta ka kaba dei ka sngi iew ka la pynïaid beit ïa ka ïew na ka bynta ban die ïa ki Masi ban pyndap ïa ka jingdonkam Doh Masi ki paidbah ha ka jylla.
Ki Myntri bad ki Longsan Mansan ka Hima mynta ka sngi ki la hiar ruh sha katei ka iew Khanapara ban pynthikna ba ka jingdie Masi ka dei ban ïaid beit ïaid ryntih khlem kano kano ka jingpynthud ïa kito kiba wan thied masi na katei ka Iew.
Naduh u Myntri ka Hima u Myntri K. Langstieh, u Basan Nongumlong, Bah S.N Daloi, u Secretary ka Hima Mylliem, u Bah Confide Rani bad kynthup ruh u Doctor na ka tnad Veterinary, u Dr. W. Khongjoh ki la don lang ha kane ka sngi, ha kaba ki bor pynïaid jong ka iew ki la die ïa ki masi hadien ka jingtohkit bniah da u Doctor ( Health Certification) ban pynthikna ba ba ki Masi kin long kiba koit ba khiah shuwa ban otdoh ïa ki na ka bynta ban die pat sha ki paidbah nongbam doh Masi.
Ha kane ka sngi ki Masi ki la duna bha ha katei ka iew hadien ka jingpyrshah da ka Khasi Jaintia Butchers Welfare Association bad kumba long haduh mynta ki don tang kumba 190 tylli ki Masi ba thmu ban die sha ki nongotdoh Masi kiba wan ban thied na katei ka iew.
Haba ïa kren bad ki Nongthoh khubor, u Myntri K. Langstieh u la ong ba ka jingwan hiar jong ki sha katei ka ïew kum u Myntri ryngbat ki Basan ka long ban pynthikhna ba ka ïew ka dei ban ïaid beit ïaid ryntih khlem kano kano ka jingpynthud na ka bynta kito kiba wan ban thied Masi.
U la ïathuh ruh ba na ka liang ka Hima Mylliem hi kam pat don kano kano ka jingkhang ïa katei ka ïew bad ka ïew ka dei ban ïaid beit man la ka sngi iew, namar kane ka ïew ka dei kata ka ïew kaba hap ha ka jingpeit jingkhmih jong ka Hima Mylliem.
U la ong ruh dang hynnin ka sngi Balang ka la don ruh ka jingïakynduh bad ka Deputy Commissioner ka Ri Bhoi ha ka ophis treikam jongka ha Nongpoh bad ka rai kaba la ai na ka DC ruh ka long ban plie beit ïa ka ïew khnang ba kan nym long ka jingthud ïa ki paidbah ba bam doh masi ha ka jylla.
“Ryngkat ka jingtip lang na ka DC ka Ri Bhoi bad ka Hima Mylliem ngi la plie beit ïa kane ka iew ha kaba wat ki bor pahara na ki Pulit ruh ki la don lang kaba long shi bynta ban nym shah ïa kino kino ki kynhun ban wan pynthud ïa kane ka iew die Masi ka Hima” u la ong bad bynrap ruh da kaba ong ba wat ki Doctor na Veterinary ruh ki don lang khnang ban pynshisha ne eksamin ba ki Masi kiba dien katei ka iew kin long kiba koit ba khiah bad kiba ym ktah ïa ka koit ka khiah ki nongbam doh masi lada die pat ha ki iew ki hat” u la bynrap.
Haba pyrshang ruh ban kylli da u Nongthoh khubor halor ka jingkynnoh ba bun ki Masi na katei ka iew ki leit sha Bangladesh, u Myntri Langstih u la kyntait mardor ïa kane ka jingkynnoh bad ka jingdon hi katei ka iew ha Khanapara kam dei satia na ka bynta ban shalan sha Bangladesh hynrei ka dei ka iew kaba la suit la shor naduh u ñi u kong ba ki Masi ba die na katei ka iew kin ïoh ban otdoh na ka bynta ban pyndap ïa ka Doh Masi sha ki paid nongbam doh masi ka jylla.
“Kino kino ki Masi ba la die na katei ka iew la pynbiang ïa ki Transit Pass ba la ai (Issue) da ka Hima Mylliem ryngkat ka (Health Certificate) ba la eksamin da ki Doctor Veterinary, hynrei ban kynnoh ba ki Masi ki ïaid sha Bangladesh kam dei ka kamram ka Hima bad ka dei ka kamram ki BSF ne ki Custom, u la ong.
Khnang ban nym thud ïa ki paidbah nongbam doh masi ha ka jylla, ka Hima Mylliem kan pynïaid beit ïa katei ka Iew kumba long baroh shi katta bad ka Hima ka kyrpad ruh ïa ki nongotdoh ba kin wan ban thied ïa ki Masi na katei ka iew ban a ka liang ka Hima ka la rai ruh ban plie beit man la ka sngi ïew ha katei ka iew Khanapara kaba hap ha kajingpeit jingkhmih ka Hima Mylliem, u la bynrap.