Press "Enter" to skip to content

ïa kynduh u Myntri ka DoNER ïa ki MP ki Jylla NE

New Delhi, Jylliew, 27: U Myntri Khynnah ka Sorkar Pdeng u peit ïa ka tnat Ministry of Development of North Eastern Region (DoNER) u Dr Jitendra Singh mynta ka sngi palei u la ïakynduh kyrpang ïa ki MP jong ki Jylla ka thaiñ Shatei Lammihngi bad ïa ki MP Rajya Sabha ha ka jingïalang kaba la long sor Guwahati. Ka jingthmu jong kane ka jingïalang ka long ban pyntip shaphang ki skhim ba la pyntreikam bad ïa ki jingthmu kiba ka Sorkar Pdeng ka la buh thong na ka bynta kane ka thaiñ Shatei Lammihngi. U Secretary (DoNER) u Dr. Inder Jit Singh, u Secretary (North Eastern Council) Shri Ram Muivah bad kiwei kiwei ki heh Ophisar ki la wan ïashim bynta lang ha kane ka jingïalang.
U Dr. Jitendra haba kren ha kane ka jingïalang u la ong ba ka Sorkar Pdeng kan ïaleh katba lah ban pynbit pynbiang ïa ka jingim jong ki paidbah ka thain Shatei Lammihngi da kaba ïatreilang bad ki Nongmihkhmat jong kane ka Thain. U la ong ba ka DoNER ka dei ka shnat treikam jong ka Sorkar kaba peit ïa ka bha ka miat jong ki paidbah kane ka thain kan trei borbah ban pyntyllun ïa ki skim hapoh ka jingpeit jingkhmih jong ka Sorkar hapoh ka jingïalam jong u Myntri Rangbahduh ka Ri u Narendra Modi. U la ong ba ïa ki kyndon halor ki DPR la pynsuk khnang ban dup lah ban pynstet ïa ki jingpyntrei ïa ki projek ha kane ka thain bad ban pynduna ïa ka jingpynslem ïa ki projek. Une u Myntri u la ong ba la bthah ruh ïa ki Myntri Rangbah bad ïa ki Resident Commissioners jong ki Jylla bapher bapher ba kin ïatreilang bad ka DoNER Ministry bad ban buddien ïa ki kam lyngba ki Ophisar halor ka jingpyntyllun ïa ki projek jong ki jylla bapher bapher.
U la ong ruh ba ha kaba ïadei bad ka jingpynheh ïa ka mang tyngka na ka bynta ki kam pynroi ïa ki jylla jong kane ka thaiñ Shatei Lammihngi la ïakren bad ka Finance Ministry.
U Dr Jitendra u la ong ba ha kaba ïadei bad ka jingbei pisa kaba 90:10 sha ki projek ba pyntreikam ha ka thaiñ Shatei Lammihngi lyngba ka NLCPR flagship scheme jong ka Ministry, 90% yn bei da ka Sorkar bad 10% yn hap ban bei beit da ki Jylla. Ka Kynhun Myntri jong ka Sorkar Pdeng ka la mynjur ba lyngba ki skhim ba thymmai lyngba ka North East Special Infrastructure Development Scheme (NESIDS) yn bei 100% da ka Sorkar Pdeng bad kane kan ïarap ban pynduna ïa ka jingpynlut pisa da ki Sorkar Jylla.
Une u Myntri u la ïathu ruh halor ka jingpynjari ïa ka Indian Forest (Amendment) Ordinance, 2017 da ka Kynhun Myntri ka Sorkar Pdeng kaba pyllait noh ïa ka jingrep siej ha ki bynta ki bym dei ki jaka khlaw da kaba buh bujli ïa ka kyntien “Dieng”, khnang ban da ïoh jingbit shwa ban pynkhyllem ïa u siej na ka bynta kano kano ka jingthmu.
U la ïathuh ha ha u bnai Naitung, 2018, ka NEC ka la pynthymmmai lyngba ka jingthung ïa u Home Minister kum u Chairman, NEC bad ïa u Myntri Khynnah ka DoNER kum u Vice-Chairman, NEC. U Dr Singh u la ong ba u Myntri ka tnat Kam Pohing ka ri u Amit Shah un sa pynïaid ïa ka jingïalang Plenary Session jong ka NEC ha ka 3 tarik bad 4 tarik, u Nailar, ha Guwahati.
Ha kajuh ka por u la ïathuh ba la thung ïa ki Chief Nodal Officers bad ïa ki Nodal officers na ka bynta ki Jylla ka Thaiñ Shatei Lammihngi. U la ïathuh ruh ba la thaw ïa ka Inter-Ministerial committees da ka DoNER Ministry ha kaba ïadei bad ka jingpeit ïa ki surok, ki kam liengsuin bad ka jngohkai pyrthei, ka ri sniang, ka jingiada ïa ki dawai kynbat bad ïa ka koit ka khiah.