Press "Enter" to skip to content

Kyntu ban nym ai NOC ïaki jaitkam ba dang lah pynïaid ki trai ri

Lum jingïalang u EM Taxation JHADC ïaki Waheh Shnong
Jowai, Jylliew 27: U Executive Member jong ka tnad Taxation jong ka Jaiñtia Hills Autonomous District Council (JHADC) u Ma Winning Garland Sungoh ula lum jingïalang ïaki nongïalam shnong jong ki shnong baper bapher ban ïaphylliew jingmut bad ïathir sani halor ka jingai jingbit ban khaïi pateng ki bar jylla hapoh u pud u ang ka konsil.
Ïa kane ka jingïalang la pynlong ha MDC Hostel haka sngi Palei. La ïadonlang ruh u Executive Member jong ka tnad Political u ma Finely Bareh bad ki sahep jong kine ki ar tylli ki tnad. Ki Waheh Shnong kiba don ha kane ka jingïalang ki dei na East Jaiñtia, Amlarem, Nartiang bad kiwei kiwei, katba ki Waheh Shnong kiba don ha sor Jowai yn sa khot jingialang ha kawei pat ka sngi.
U Ma Winning ula ïathuh ba ka daw ba khot ïa kane ka jingïalang kyrpang ïaki Waheh Shnong kadei namar ba jyllei ki bar jylla kiba khaii pateng khlem ki kot ki sla ba biang.
Ha kane ka jingïalang la ïakut ba ki Waheh Shnong lada lap kino kino ki bar jylla kiba khaïi pateng khlem ki kot ki sla ba biang ki dei ban ai jingtip mar mar sha ka konsil khnang ba kin lah ban leh ïaka jingdonkam, bad lada donkam ban khang ruh kin khang shisyndon ïa kano kano ka jait kam ne khaïi pateng u bar jylla bym don kot don sla ba biang ban khaïi pateng (Trading License).
Ula kyntu ruh ïaki nongïalam shnong ba haba ki ai NOC kin dei ban bishar bin pa bin îaka jait kam ba u bar jylla u kwah ban khaii pateng ha kane ka thain bad ïa ki kam ba danglah ban trei da ki jaitbynriew jong ngi ne ki trai ri ym dei satia ban ai NOC pathar.
Ula ïathuh ba katkum ka jingkhein kaba don ha konsil mynta ki don haduh palat 1400 tylli ki trading license ki bar jylla kila ioh license ha ki jait kam bapher bapher.