Press "Enter" to skip to content

Sdang beh ka lyer ba dang khroh ka NPP ïa palat 10 ngut ki MLA ka Congress

Shillong, Jylliew 27 : Hadien ba ka BJP ka la jop donburom bad ïoh ban bat biang ïa ka jingsynshar ha ka sorkar pdeng, kiba bun ki nongïalam jong ki party ha kylleng ka ri ki la khih klang bad don ruh kiba la leit pynïasoh sha katei ka party ruh. Hangne ha jylla Meghalaya pat ka lyer ka la sdang ban beh ba ka NPP kaba ïalam ïa ka jingsynshar ka la sdang ban khroh ïa palat 10 ngut ki MLA jongka Congress ban pynïasoh bad ka.
Ki tyllong khubor kiba la ïohlum ki ïathuh ba tad haduh mynta, ka NPP ka la sdang ban kynjoh ktien shaduh 11 ngut ki MLA, kata 4 ngut na Rilum Khasi – Jaiñtia katba kiwei pat kiba sah kidei na rilum Garo. La ong ruh ba ka jingïakren ka dang ïaid shakhmat bad ka lah ban poi haduh u pud ba kin don haduh 6 ngut ki MLA ka Congress tang na Rilum Khasi – Jaiñtia, ki ban poi baroh 13 ngut na ki 19 ngut ki MLA ba ka Congress ka don.
La ïoh jingtip ruh ba ym tang ki MLA kiba thmu ban leit pynïasoh hynrei don ruh ki nongïalam ka Congress kiba donlang ha kajuh ka thup.
Halor kane, haba pyrshang ban ïakren bad katto katne ki MLA Congress , ki la kyntait mardor hynrei don pat ki nongïalam jong ka party kiba ong ba ha ka saiñpyrthei hi kin ym lah ban batai lypa ïa ka ban sa wan. Wat haba pyrshang ban pyntikna ïa kane na ki nongïalam ka NPP ruh ym shym ïoh satia namar kim shim ïa ka phone ban kren.