Press "Enter" to skip to content

Yn ïakren bad ka sorkar pdeng ba khreh pynlong Compulsory ïa ka Hindi : Lahkmen

Iamir jingmut halor ka National Education Policy

Shillong, Jylliew 27 : Ka sorkar Jylla ka la rai ban ïa kren bad ka sorkar pdeng ba kan pynneh beit kumjuh haba ïadei bad ka jingthmu ban pyntreikam noh salonsar ïa ka ktien Hindi ha ki jaka pule ha kane ka jylla.
“Ngin sa ïa kren bad ka sorkar pdeng namar katkum ka Language Policy, donkam ban pynneh shwa kumjuh (status quo) naba katkum ka Draft National Education Policy (NEP), 2019, ïa ka Hindi dei ban pynlong ka ktien salonsar compulsory) haduh ki kyrdan Secondary katba tad haduh mynta pat kidei tang naduh class V haduh VII,” ong u Myntri ka tnad Pule Puthi ka sorkar jylla, Bah Lahkmen Rymbui hadien ka jingïalang halor katei ka phang.
U ong ruh ba ka sorkar jylla kan ym leh satïa kino kino ki kam kiba lah ban ktah ïa ka jylla, khamtam haba ka pule puthi ka hap ha ka ‘Concurrent List’.
Utei u Myntri u la pyntip ruh ba ka sorkar jylla kan ïakren ruh bad ka sorkar pdeng halor ki jingsngew bala pynpaw da ki kynhun niam haba ïadei bad ka jingbym kdew jong katei ka NEP kaba don haduh 448 page halor ki skul khristan bad ruh halor ki kamram jong ki school managing committee.
“Ïa kane ngim lah ban len ba ha Meghalaya hi, ki jaka pule jong ki balang ki la noh synñiang shibun ha ka pule puthi bad khamtam eh ban kyntiew bad pynkylla dur ïa ka jingnang jingstad ha ka jylla,” u la ong.
Na ka liang u Myntri u la pyntip ruh ba ka sorkar jylla kan pan jingshai shuh shuh halor ka rai jong ka sorkar pdeng ban don ïa ki pre-nursery bad ruh ban kyntiew kyrdan ïa ki skul kiba don tang class -X shaduh class – XII.
“Ngi donkam ruh ban pyrkhat kumno ban pynïaid ïa ki kyrdan secondary kiban sa ngat naduh class – 9 haduh class – 12 namar katkum ka draft NEP, baroh ki skl kin hap ban don haduh class 12. Kumta mano ban bei tyngka ïa kine ki skul kiban hap ban kyntiew na ka class – X sha ka class – XII. Kidon ruh ki katto katne ki ishu kiba ngi kum ka sorkar jylla ngi kwah ba ka sorkar pdeng kan peit lang,” u la bynrap biang.
Nalorkata u ong ruh ba ka sorkar kaba don ha ka jingkyrduh pis kan hap ruh ban bishar bniah kumno kan lah ban pynbiang lut ïa ki jingdonkam sha ka skul, lada ka rta na kabynta ban sdang skul kan long naduh lai snem ka rta. “Ngi donkam ka jingkyrshan pisa bad kane kadei ka jingkit kaba khia bha ïa ka sorkar.”
Lah ban kdew hangne ba ka tarik ba khatduh ban ai jingmut na ki riew paidbah halor ka draft NEP 2019 kan dei haduh ka 30tarik mynta u bnai.
Haba ïadei pat bad ka jingleit pule pyntbit jong ki nonghikai, u ong ba ka jingïalang ka la rai halor ka jingtyrwa na ka sorkar pdeng ba kum kitei ki jaka pule (standalone institution) dei ban pynkut noh, kaba mut ba ka B.Ed College ha Tura bad ki 7 tylli ki District Institute of Education and Training (DIETs) ki hap ban khang noh.