Press "Enter" to skip to content

17 tylli ki takma khur ka kynhun ïakhun kti ka MAWA na Chhattisgarh

Shah jied 6 ngut ban mihkhmat ïa ka ri sha Romania

Shillong, Naitung 10: Ka khubor ba sngewtynnad bad kaba wanrah shisha ïa ka nam bad burom ïa ka jylla ka long ba ka kynhun ïakhun kti ka jylla hapoh ka lama jong ka Meghaaya Arm Wrestling Association (MAWA) ki la ioh ba kin khur 3 tylli ki takma ksiar, 7 tylli ki takma rupa bad 7 tylli ki takma rnong, ha ka jingleit ban ïashim bynta ka jong ki sha ka rynsan ïakhun jong ka National Arm Wrestling Championship 2019 ba la long ha sorbah Bhillai, Chattishhgarh.
Ki nongjop na kane ka rynsan ïakhun ki long ka Margareth Pathaw kaba la ioh ba kan khur ïa ka takma ksiar na ka kyrdan jingkhia ba 60kg ka Ewan Shuwa Suchiang ba la khur ïa ka takma rnong, ka Aiboklin Rina ba la khur ïa ka takma rnong na ka kyrdan jingkhia kaba 70 Kg, ka Mihsngewbha Rymbai kaba la ioh ba kan khur ïa ka takma rupa na ka kyrdan jingkhia kaba 80Kg bad kane ka juh ka thei ïalehkai ka jylla ka la ioh ba kan khur ia ka rupa bad rnong (Right) Bronze(Left) na ka kyrdan ïakhun Women Master Category ka kyrdan jingkhia kaba 80kg.
Haba phai sha ka liang ki shynrang, ki nong ïalehkai kiba la ioh ba kin khur ïa ki takma ki jong ki na kane ka rynsan ïakhun ki long u Hubert Paliar ba la ioh ban khur ïa ka takma rupa na ka kyrdan ïakhun kaba 55 Kg, u Everson Thangkhiew ba la ioh ban khur ïa ka ksiar (Right), rnong (Left) na ka kyrdan ïakhun jong ka Men Master Category 80 kg, u Baniaikyrsoi Khongwir khur ïa ka takma rupa (Right), rnong (Left) ka Men Master Category 90kg.
Haba ïadei bad ka jingïakhun ïa ka Men Physically Challenge , u Hubert Paliar ula ioh ban khur ïa ka takma rupa (Right & Left) bad u Alexander Lyngdoh ba la ioh ban khur ïa ka takma rupa (right) bad rnong (left) na ka kyrdan jingkhia kaba 70 Kg.
Ka MAWA ka sngew-kmen ban pyntip sha ki paidbah ba hynriew ngut ki nong ïalehkai ka jylla mynta ki la shah jied naka bynta ba kin mihkhmat ïa ka India sha ka rynsan ïakhun ba la tip ïa ka kum ka 41st World Arm Wrestling Championship 2019 ba la buh ban long ha Constanta, Romania naduh ka 26 tarik u bnai Risaw haduh ka 4 tarik u Naiwieng mynta ka snem
Kine ki hynriew ngut ki nongïalehkai ki kynthup ïa ka Margareth Pathaw, Mih-sngewbha Rymbai, Hubert Paliar, Alexander Lyngdoh, Everson Thangkhiew bad Baniaikyrsoi Khongwir.